Қоржында 3 қола
Төрткүл дүние көз тіккен жазғы Олимпиада ойындары күн сайын қызықты оқиғаларымен есте қалуда. Қазақстан құрамасының спортшылары түрлі жарыстар бойынша бақ сынауда.Әзірге ұлттық құраманың қоржынында 3 қола медаль бар. Байрақты бәсекенің екінші күнінде 60 келі салмақта татамиге шыққан дзюдошы Елдос Сметов алғашқы медальді қоржынға салды. Рио Олимпиадасында күміске қол жеткізген спортшы бұл жолы қоланы қанағат тұтты. Екінші айналымнан бастаған атлет түркиялық Аққұс Миражды ұтты. Ширек финалда Оңтүстік Корея өкілі Ким Вон Джуннан айласын асырған жерлесіміз жартылай финалда татами иесі Наохиса Такатоға жол берді. Ал қола үшін таласта Нидерландия спортшысы Торние Цакаджоені жеңді.
Теннистен Елена Ребакина үшінші айналымға өтті. Ерлер арасында Михаил Кукушкин Токио Олимпиада ойындарын жеңіспен бастады. Ал боксшы 57 келідегі Серік Теміржанов пен 63 келідегі Закир Сафиуллин, 52 келідегі Сәкен Бибосынов келесі кезеңге өтті. Қазақстандық спортшылар садақ ату, суда жүзу, стенд ату, су добынан жеңіліс тапты. Үстел теннисінен Кирилл Герасименко алғашқы айналымда жеңіске жеткенімен, келесі кезеңде германиялық қарсыласына жол берді. Спорттық гимнастикадан Милад Карими үш санат бойынша финалға шықты.
Олимпиаданың үшінші күнінде ауыр атлет Игорь Сон ел қоржынына екінші қола медальді салды. Тартысты бәсекеде қазақстандық спортшының жолы болды. Ол жұлқа көтеруде 1 рет қателескенімен, серпе көтеруде нәтижесін жақсарта түсті. Осылайша, екі бағдарлама қорытындысы бойынша 294 ұпай жинаған спортшы қола медальға қол жеткізді.
– Токиоға дейін осынша салмақ көтерген емеспін. Демек, бұл – менің ірі жарыстарда көрсеткен ең жақсы нәтижем. Жаттығу залында қарсыластарды бақылап отырдық. Басты қарсыласым зілтемірді қисайтып алған кезде де уайымым кете қоймады. Бәрі болуы мүмкін. Мен жұлқа көтеруден жақсымын, серпеден біраз қиындық бар, – дейді Олимпиада ойындарының жүлдегері.
Кеше ауыр атлет Зульфия Чиншанло ұлттық құрама қоржынына үшінші қола медальді салды. Қазақстандық спортшы 55 келіге дейінгі салмақта жарыс жолына шықты. Зілтемірші жұлқа көтеруде 90 келіні бағындырса, серпе көтеруде 123 келіні басынан асырды. Осылайша, қос сайыс көрсеткіші бойынша ауыр атлет қола медаль алды.
