Барлық салада даму динамикасы сақталған

Жақында облыстың бас басылымы «Сыр бойы» газетінде аудан әкімі Берік Сәрменбаевпен арнайы сұхбат жарияланды. Тілші Айсәуле Қарапаеваның жүргізген сұхбаты үлкен сұранысқа ие болып, газеттің ресми сайтында да көп қаралым жинап үлгерген.

Аталған сұхбатта аудан әкімі ауданымыздың тыныс-тіршілігі, даму деңгейі, экономикалық әл-ау­қатынан ақпарат берген. «Ел Президенті Қасым-Жомарт Тоқаев­тың тапсырмасымен, ай­мақ бас­­шысының қолдауымен мем­лекеттік бағдарламалар аясында ауданда жоспарланған ауқымды жұмыстар жүзеге асып, әлеуметтік-экономикалық даму бағытында тұрақты өсім қалыптасты. Жыл басынан бері ауданда барлық сала бойынша даму динамикасы сақталды» деді аудан әкімі жур­налистерге берген сұхбатында.

Расында, бүгінгі таңда ауда­нымыз жан-жақты дамып, өсудің оң тенденциясы қалыптасып келе жатқаны жасырын емес. Эко­номикаға тікелей ықпал ететін ауданның өнеркәсіп орындары 42,5 млрд теңгенің өнімін өндіріп, өткен жылдың тиісті кезеңіне қара­ғанда 7,5 пайызға ұлғайған. Оның ішінде, өңдеу өнеркәсібі 6,9 млрд теңгені құрап, 34,7 пайызға өскен. Ауыл, орман және балық шаруашылығының жалпы өнімі осы жылдың қаңтар-мамырында 2,5 млрд теңгені құрап, өткен жылдың тиісті кезеңімен салыстырғанда 2,7 пайызға артқан. Сондай-ақ биыл аудан экономикасына 30,7 млрд теңге негізгі капиталға инвестиция тартылған. Бұл өткен жылдың тиісті кезеңімен салыстырғанда 118,5 пайызды құрайды. 8139 шаршы метрге тұрғын үй салынып, 5,3 пайызға ұлғайды.

Құрылыс жұмыстарының көлемі биыл 5197 млн теңгені құрап, 107 пайыз болған. Бөлшек сауда айналымының нақты көлемі 1,3 млрд теңге болып былтырғы тиісті кезеңімен салыстырғанда 100,2 пайызды көрсетті. 2025 жылдың 1 маусымына 2698 шағын және орта кәсіпкерлік субъектілері тіркелген. Оның 153-і шағын және орта кәсіп­керлікпен айналысатын заңды тұлғалар, 1275 жеке кәсіпкер, 1270 шаруа және фермер қожалығы бар.

Ал жұмыс жасап тұрған кәсіпкерлік субъекті саны 2639 болып, өткен жылдың осы кезе­ңімен салыстырғанда 96,6 пайызды құрайды. Жұмыс жасап тұрған кәсіпкерлік субъектілерінің үлесі 97,8 пайыз. Аталған көрсет­кіш­тердің барлығы ауданның даму динамикасының жоғары екенін байқатады.

Сондай-ақ аудан әкімі аталған сұхбатта аудандағы іргелі істер, басты жобалар, ауданның туристік әлеуетінің даму қарқыны, жол сапасы мен көлік қатынасы, ауызсу мәселелері мен құрылыс жұмыстары туралы сұрақтарға жауап берген.

Айта кетейік, қазіргі аудан келбетін осыдан бірнеше жыл бұрын­ғымен салыстыра алмай­сыз. Себебі жыл сайын жөндеу жұмыстары жүргізіліп, орталық алаң, негізгі көшелер, көпқабатты тұрғын үйлер жөнделіп, ауданы­мыздың көркі көз тартады. Қалыптасқан жұмыс жүйесі бар ау­данымыз жан-жақты үлгі етуге тұрарлық. Жері шүйгін, халқы мамыражай ауданның дамуы жолында жүйелі жұмыстар жал­ғасын тауып келеді.

«Тт» ақпарат

Фото: Ашық дереккөзден