Кандидаттар бағдарламаларын таныстырды

Мемлекет басшысы Қасым-Жомарт Кемелұлы Тоқаев Қазақс­тан Республикасы Парла­менті Сенаты­ның депутаттарын сайлауды 2023 жылғы 14 қаңтарға тағайындау туралы Жар­лыққа қол қойды. Соған байланысты елімізде Жаңа жылдың басында аса маңызды саяси науқан өткізіледі деп жоспарлануда. Осыған орай, Сыр өңірінен ҚР Парламенті Сенатының депу­таттығына кандидаттар тіркеліп, кездесулер өткізуде.

Аймақтан ҚР Парламенті Сенатының де­пу­тат­тығына кандидаттар Жорабек Нұрым­бетов, Руслан Рүстемов және Асылбек Шә­меновтің өкілі Димаш Кенжалиев ауданға арнайы келіп, аудандық мәслихат депутаттарымен кездесті. Кандидаттарды ҚР Пар­ламенті Сенатының депутаты Мұрат Бақтиярұлы бас­тап келді. Сондай-ақ кездесуге қоғам қайраткері Биғали Қаюпов, философия ғылымдарының докторы, профес­сор Баймырза Қожамберлиев, «Өрлеу» ұлттық орталығының директоры, профессор Бауыржан Елеусінов, аудан әкімінің орынбасары Димаш Байдушев қатысты. Жиынды аудандық мәслихаттың хатшысы Ержан Әжікенов ашып, жүргізіп отырды.

Жиында кандидаттар өмірбаяны мен бағ­дарла­маларын таныстырды. Алдымен, ҚР Пар­ла­менті Сенатының депутаттығына кандидат А.Шәменов­тің өкілі Димаш Кенжалиев сөз сөйледі. Ол кан­ди­даттың өңірдің әле­уетімен жақсы таныс екенін айтып, маңызды мәселелерді мемлекеттік дең­гейде көте­ру­ге бар күш-жігерін жұмсайтынын жет­кізіп, ал­дағы мақсат-міндеттерімен бөлісті. Бі­лім, денсаулық салаларын дамытудағы, өндіріс өнер­кәсібін өркен­детудегі жоспарларын атап­ көр­сетті.

Мұнан соң ҚР Парламенті Сенатының депу­таттығына кандидат Жорабек Нұрым­бетов сөз алып, Мемлекет басшысы Жаңа Қазақстанды қалып­тастыру жолында Сенат­тың депутаттық корпусының бәсеке­лестік, ашықтық қағидатқа сай болуын атағанын айтты. Соған байланысты өзі ұзақ жылдар бойына су шаруашылығы саласында еңбек етіп жүргенін жеткізіп, өзінің бағдарламасы өңірдегі су ресурстарын реттеуге қатысты еке­ніне тоқталды. Сырдария өзені мен Кіші Арал суын қалпына келтіру үшін транс­шекаралық байланысты нығайтып, сенатор болып сайланса, осыған жұмыс жасайтынын алға тартты.

Ал ҚР Парламенті Сенатының депу­­тат­тығына кандидат Руслан Рүстемов халық қалаулысы атану үлкен жауапкершілік жүк­тейтінін, депутат ретінде сайланса, ха­лық­тың мұң-мұқтажын мінберде жеткізу үшін аянбай еңбек ететінін тілге тиек етті. Өзінің бағ­дарламасында әлеуметтік сала, мәдениет пен білім, агроөнеркісіптік саланы дамытуға басым бағыттар берілетінін жеткізді. Мемлекеттік қызметтің түрлі беле­сінен өте жүріп, бірқатар заңдарда қара­ма-қайшылықтар кездескенін жет­кізді. Оның ішінде, мәдениет пен спорт саласында жетілдіретін, аудан басқарып жүргенде қы­сыл­таяң шақтарда төтенше жағдай жариялауда заңнамалық акті­лердің өңірге сай келмей жататын тұсын атап айтты.

Жиын барысында ҚР Парламенті Сена­тының депутаты Мұрат Бақтиярұлы халық қалаулысы ретінде біраз жұмыстардың ат­қарылғанын, халықтың көптеген мәселесін Үкіметке жеткізгенін, олардың шешім табуы­­на атсалысқанын айтты.

– ҚР Парламенті Сенатына екі мәрте сай­ланып, 12 жыл халық қалаулысы ретін­де еңбек етіппін. Осы уақыт аралығында 30-ға жуық Заңның шығуына төрағалық етсем, бірқатарының кері қайтарылуына ық­пал еттік. Ел бюджетінің бөлінісін де қам­тамасыз еттік. Осы қызметте жүріп мол тәжірибе жинадық. Мемлекет және қоғам қайраткері Әбіш Кекілбаевпен Сенат қабыр­ғасында бірге отырып, ол кісіден де көп нәрсе үйрендік. Сондықтан осы жоғарғы палатада қызмет ету – менің өмірімнің негізгі белестерінің бірі. Сыр өңірінде өзіндік айтары бар, сенаторлыққа лайықты тұлғалар жетер­лік. Олар әрі қарай өңір әлеуетінің жақсаруына, елдің мұңын жеткізуге еңбек етуі тиіс. Сондықтан кандидаттарға сәттілік тілеймін. Ал осы жылдар ішінде маған сенім артқан барша тұрғынға шынайы алғысымды білдіремін, – деді Мұрат Бақтиярұлы.

Сенатор ел дамуы жолында атқарған жұ­мыстарын қағаз бетіне түсіріп, әр жылдары кітап шығарған. «Аманат», «Менің дәуірім, менің сөзім», «Елдің жоғын жоқта­дық, Сыр­дың мұңын мұңдадық», «Құндылық­та­ма», «Сенатордың жазбалары» атты кітаптар топ­та­масын жиынға қатысқан аудандық мәс­ли­хат депутаттарына сыйға тартты.

Кездесуде қоғам қайраткері Биғали Қаю­пов, философия ғылымдарының докторы, профессор Баймырза Қожамберлиев, «Өр­леу» ұлттық орта­лы­­ғының директоры, про­фес­сор Бауыржан Елеусінов те сөз сөйлеп, Сенат қабырғасында М.Бақтияр­ұлы­ның ат­қарған еңбегі орасан зор екенін жеткізді. Сондай-ақ еліміздегі саяси реформалар, мемлекеттік басқару сала­сындағы жаңа­лықтар, өңірдің өзек­ті мәселелері мен кан­дидаттардың бағ­дарламалары туралы пікір білдірді.

Кездесу соңында аудандық мәсли­хат­тың хатшысы Е.Әжікенов кандидат­тарға сәт­тілік тілеп, өздерінің бағдар­ламаларын, жоспарларын кеңінен та­ныс­тыр­ғаны үшін депутаттық корпуст­ың атынан алғыс біл­дірді. Сонымен қатар ҚР Парламенті Сена­тының депутаты Мұрат Бақтиярұлына қа­за­қы дәстүрмен иығына шапан жауып, сый-­құр­мет көрсетті.

Е.БЕРКІНБАЕВ