Ғалымдар болжамы бойынша, 2019 жылы адамзат тарихындағы ең ыстық жыл болады екен. Осыған дейін аптап ыстықтың салдарынан Қазақстанның 4 облысында ескерту жарияланған болатын. Әлеуметтік желілерде де Қазақстанның әр аймағыгнда ыстық болып жатқанын жазуда. 2015-2018 жылдар аралығында көмірқышқыл газы шығындарының артуына байланысты дүние жүзінде ауа температурасы көтеріліп едәуір ыстық болған. Мысалы, былтыр ақпан айында Алматы қаласында 1979 жылдан бері тіркелмеген ыстық ауа райы тіркелген. Яғни, күннің күрт жылынуынан ауа температурасы 22 градусқа дейін ысыған. Ал 1979 жылы бұл көрсеткіш 19 градусқа дейін жеткен. Жалпы жаһандық жылыну деген термин сөздік қолданысымызға енгелі қай заман. Әлемдегі парниктік газдардың көптеп бөлінуінен ауа райы жылдан жылға ысып келе жатыр. Егер адамзат алдағы 17 жыл ішінде жер бетіндегі ауа-райына деген көзқарасын өзгертпесе, Жер атмосферасындағы өзгерістерді кейін тоқтата алмайды. Ал ауаның орташа температурасы + 2 градустан асып кетуінің алдын алу мүмкін емес болып қалады. Оның салдарынан Антарктидадағы мәңгі мұздардың көбесі сөгіліп, Жер жүзін су басады. Жақында ғана күннің ұдайы жылынуының салдарынан Гавай архипелагына кіретін "Валака" аралы жер бетінен жоқ болып, су астына кетті. Жалпы Қазақстан аумағында да күн ысып кеткені жайлы жиі айтылып жүр. Бір сәт айналаға да көз салып, дүние жүзінде не болып жатқандығынан хабардар болсақ. Егер сіз Қызылорда немесе Шымкентті ыстық десеңіз мына елдерге барып көріңіз. Жер бетінде біз сөз еткелі отырған ыстық мекендерден де өткен аптапты  жерлер бар. Біз бірақ ыстықты адаммен байланыстырмақшымыз яғни халық көп тұратын ең ыстық мекендерді атап өтетін боламыз. 

7. Африка... Аптап... Каир... Мысыр астанасында 20 миллион халық тұрады. Оның 2 миллиондайы ғана Нілден есетін салқын желден рахат ала алады. Қалғандары елдегі ыстық ауа райына төзіп өмір сүруге мәжбүр. Бұл қалада жаз айында ауа райы 48-49 градусқа дейін көтеріледі.

6. Феникс және Лас-Вегас. АҚШ Феникс жаз айындағы қарға миы қайнайтын ыстыққа қарамай АҚШ-тағы ірі қалалардың бірі. Өзіне жарасатын аспанмен таласқан ғимараттары бар. Бұл қалада жаңбыр сирек жауады, ауа райы 49-50 градусқа дейін ыстық болады. "Күнәлілер қаласы" атанып кеткен Лас-Вегастың ауа райы да дәл осындай. 

5. Қасиетті Мекке қаласы Жергілікті тұрғындары 2 миллион бұл шаһарға жыл сайын зиярат етіп келушілердің саны 15 миллион. Өзі шағын болған аумақта соншалықты көп адам топталғаннан кейін ауа райы да ысып кететіні табиғи. Бұл жерде 40 градус орташа болып есептеледі. Ал жаз күндері Меккеде 50-51 градусқа дейін аптап ыстық болса ешкім таңғалмайды. 

4. Мельбурн, Аустралия Мельбурнның өзіне тән қасиеті – бұл қалада жыл он екі ай ыстық болады. Оңтүстіктен соғатын аптап жел, жыл сайынғы орман өрті онсыз да ыстық қаладағы ауа райын 51 градусқа дейін көтеріп жібереді.

3. Гонконг пен Бангкок Көпшілік Гонконг пен Бангкокты шатастырады. Олардың бір-біріне ұқсайтын жақтары да бар. Мысалы, екеуі де Азияда орналасқан. Екеуіне де туристер көп барады. Бұдан бөлек, тағы бір ұқсас жағы – екі қалада да ауа райы тым жоғары. Күн ыстық! Бір кездері ағылшындардың қол астында болған Гонконг қаласы ҚХР құрамына кіргеннен кейін де өз тұрмыс тәрізін, сұлулығын жоғалтқан жоқ. Бірақ қала тұрғындарын климаттың өзгеруі қинайды. Бұл жердегі жоғары өндіріс зауыттары, ұзыннан ұзақ көлік кептелісі, адамдардың тым көптігі салдарынан жаз айында ауа температурасы 52 градусқа дейін жетеді.

Астанасы Бангкок қаласы болатын Тайланд саяхатшылар елі аталуымен мәлім. Бұл жерде туристерді құдайындай сыйлайды. Сонымен қатар Бангкок ірі өндіріс зауыттары бар қала болып та есептеледі. Бұл жерде ауа райы бірнеше рет 50 градустан жоғары болған. Тіпті кейде 53 градусқа дейін шыққан.

2. Мехикали, Мексика Мексиканың Мекихали қаласын "күн тұтқынындағы қала" деп бекерге атамайды. Теңіз деңгейінен 8 метр ғана биіктегі төбешіктерде орналасқан Жер бетіндегі миллионға жуық тұрғыны бар ірі қалалардың бірі. Бұл жерде ауа райы 54 градусқа дейін ысиды

1. Сан-Луис-Рио-Колорадо, Мексика 120 мыңға жуық халқы бар, Мексика сахараларында орналасқан аталған қаланы көпшілік біле бермейді. Бұл қала абсалютті ыстық тіркелген "Өлім аңғарына" жақын орналасқан. Солтүстік Африка, Сауд Арабиясы, Ирак сынды елдермен бір белдеуде орналасқан қалада тіршілік қыз-қыз қайнауда, тіпті жыл сайын туристер де келеді. Бұл жерде ауа райының ең жоғарғы көрсеткіші 55,5-56,5 градус.