ХАЛҚЫНА ЖЫР СЫЙЛАҒАН ...

Белгілі ақын, ҚР Мемлекеттік алғашқы әнұранының авторларының бірі жерлесіміз Жадыра Дәрібаева 70 жасқа толып отыр. Бұл мерейлі күнді атап өту Қазақстан Республикасының Президенті Н.Ә.Назарбаевтың «Болашаққа бағдар: рухани жаңғыру»  атты бағдармалық мақаласынан туындайтын мәселеЛЕрді ілгерІлету және ұйымдастыруға арналған іс-шаралар жоспарына да ендірілген. Сондықтан халқының ерке қызына айналған ақынның жыр-шумақтарын оқырманға ұсынғанды жөн көрдік.

ЕЛІМЕ

Салмағы артып мысыңның,
Тірегім болшы, туған ел.
Менде бір өршіл қызыңның,
Өзіңмен өсіп, буған бел.

Көктемін құшқан көкірек,
Қалыпты қыстан қысылып,
Құрдымға кетіп көп тілек,
Желтоқсан желі ұшырып.

Санамды сыздан құрғатып,
Шабытым шалқып шалқарда,
Қиырда сырлы үн қатып,
Жүргенім сенің арқаңда.

Алақан толып нұр, баққа,
Адамың жатса күн аттап,
Ұлы күн туар ұрпаққа,
Жігерің тасып, жыр қаптап!

Тәж киіп лағыл шуақтан,
Күн санап өскен алыптай,
Өзіңе сеніп қуаттан,
Жүзіңді жүзге қарытпай!

Мұң-шерін Армен жуған ұлт,
Сындарлы, дана, қайырымды,
Сенерім сенсің, туған жұрт,
Көрмейін енді қайғыңды!

АЗАМАТҚА

Сыр алдырмай, өтсем егер сындардан,
Аға толқын тәлімімен шыңдалғам.
Жақсыларға кезіктірген тағдырды
Жалықпаспын шын жүректен жырлаудан.

Масаттанып масаңсудан аулақпын,
Жылағанның жүрек сырын аулаппын,
Өнегеме өрісімді өсірген,
Түйсігі бар жас ұрпақты баулаппын.

Ыждағаттық ығына алып ықтырса,
Сәуір сәттер мөлдірлікті ұқтырса,
Ұлылардың ұлағаты дем беріп,
Салиқалы қасиетін жұқтырса.

Тәуірлерді айту керек тәуір деп,
Көбейгені күншілдердің ауыр тек.
Абыройы ортақ елдің ұл, қызға,
Бақыт жасап бермес өзге қауым кеп.

Қатерлер көп тұнып тұрған жерге де,
Ол да қазір көз жастардан шерменде,
Бөліп-жарып тартқылайтын түгі жоқ,
Үмітпенен қарайды ел ерлерге...

НИЕТ

Абырой тілеп таңды атам атырған,
Әрбір күнін тағзым етіп батырған.
«Бала берсең, сана бер» деп тілеумен,
Келешектің жайын ойлап аһ ұрған.

«Жұқтырмашы өн бойыңа жаман ат,
Аздырмайды адамзатты қанағат»,
Санамызды саралайтын қарттарым,-
«Риза болсын – деп, ісіңе жамағат».

Таптамайтын ешкімнің де намысын,
Алушы еді кілең жұрттың алғысын,
Сиреп кетті сол қарттардың қатары,
Ниеттері киінгіге дарысын.

Ақ тілегі қабыл болып бабаның,
Сағы сынбай келген туған даланың,
Ізгілікті ұялатсақ жүрекке,
Талайы әлі туар еді дананың.

***
Үмітім үзілмейді,
Күндерім жалғасады.
Тамаша күзім келіп,
Сары ала нұр шашады.

Пейіштің шырағындай,
Жапырақ бал-бұл жанып.
Әуеннің ырғағындай,
Кетті ауа толқынданып.

Жаяды құшағын жыр,
Таңырқап тамсанамын.
Жылыстап ұшады жыл,
Мен Сені қарсы аламын...

***
Мен болсам ғұмыр-әдеппен,
Пір тұттым адам баласын,
Достасып сұлу сонетпен,
Емдедім жанның жарасын.

Самалын жұттым сан кештің,
Жұлдызды түнде жұбандым,
Ақпанда әппақ қар кештім,
Жақсылар үшін қуандым.

Өмірім мәнді, мәнсіз бе,
Өтінде заман - құйынның,
Демеу боп жүрдім әлсізге,
Тәңірге ғана сыйындым.

Жадыра ДӘРІБАЕВА,
ақын, ҚР Жазушылар Одағының мүшесі