Негізгі көрсеткіштер өсім көрсетті
Ауданда әлеуметтік-экономикалық даму бағытындағы жұмыстар жүйелі түрде жалғасып, халықтың әл-ауқатын арттыруға, экономиканың тұрақты өсімін қамтамасыз етуге және әлеуметтік саланы дамытуға басымдық берілуде. Жыл басынан бері негізгі салаларда бірқатар ауқымды жобалар жүзеге асырылып, өндіріс, бюджет, денсаулық сақтау, мәдениет, спорт, жұмыспен қамту және абаттандыру бағыттарында нақты нәтижелерге қол жеткізілді. Атқарылған жұмыстардың қорытындысы аудандық мәслихаттың кезекті сессиясында жан-жақты сараланды.Аудан әкімі Берік Сәрменбаевтың қатысуымен аудандық мәслихаттың кезекті сессиясы өтті. Жиынға аудандық мәслихат төрағасы, мәслихат депутаттары, кент және ауылдық округ әкімдері, бөлім басшылары қатысты. Сессияда аудан әкімі 2026 жылдың бірінші жартыжылдығында атқарылған жұмыстар бойынша есеп берді.
– Мемлекет басшысының тапсырмасымен, аймақ басшысының қолдауымен ауданда барлық негізгі макроэкономикалық көрсеткіштердің өсімі қамтамасыз етілуде. Аудан бюджеті жыл басында 10 млрд теңгеге бекітілсе, шілде айындағы нақтылаумен 13 млрд теңгеге жетті. 2026 жылдың 1 шілдесіне өнеркәсіп орындары 55,8 млрд теңгенің өнімін өндіріп, көрсеткіш 4 есеге ұлғайса, өңдеу өнеркәсібі 6,3 млрд теңгені құрап, 32,2 пайызға өсті. Сонымен қатар ауданның әлеуметтік және қоғамдық өмірінің барлық бағытында ауқымды жұмыстар атқарылуда. Денсаулық сақтау саласы заманауи медициналық құрал-жабдықтармен толықтырылып, «Терапия» бөлімшесі жаңғыртылды. Мәдениет саласында көптеген іс-шаралар ұйымдастырылып, аудан өнерпаздары түрлі деңгейдегі байқауларда жоғары нәтижелерге қол жеткізді. Сондай-ақ спорт саласында аудан спортшылары 216 медаль жеңіп алды. Жастар саясаты, абаттандыру, жұмыспен қамту және әлеуметтік қолдау бағыттарында да жүйелі жұмыстар жүргізілуде. Ауданды дамыту бағытында Мемлекет басшысының тапсырмаларын басшылыққа алып, облыс әкімінің қолдауымен жоспарлы жұмыстар жүргізілуде. Осы ретте, аудандық мәслихат депутаттарының да ауданның әлеуметтік-экономикалық дамуына қосып жүрген үлесін ерекше атап өткім келеді. Сіздер маңызды бастамалардың жүзеге асуына, өзекті мәселелердің оң шешім табуына әрдайым белсенді атсалысып келесіздер, – деді аудан басшысы.
Жалпы 2026 жылдың бірінші жартыжылдығында ауданда жоспарланған міндеттерді орындау бағытында жүйелі жұмыстар атқарылып, бірқатар маңызды көрсеткіштерге қол жеткізілген. Алдағы кезеңде де ауданның экономикалық әлеуетін арттыру, әлеуметтік нысандардың сапасын жақсарту, халықты жұмыспен қамту және тұрғындардың өмір сүруіне қолайлы жағдай қалыптастыру бағытындағы жұмыстар жалғасын табады. Айта кетейік, сессия қорытындысымен күн тәртібіндегі мәселелер қаралып, тиісті шешімдер қабылданды. Сессия барысында қабылданған шешімдер маңызды міндеттердің тиімді жүзеге асуына негіз болып, ауданның одан әрі дамуына серпін бермек.
А.МҰХАНБЕТҚАЛИ
