Дарынды әрі талантты балалармен кездесуде Мұрат Нәлқожаұлы Мемлекет басшысының білім мен ғылымға ұмтылысты қол­дауының арқасында өңірде ауқымды жұмыстар ат­қа­ры­лып жатқанын атап өтті.

– Мемлекет басшысы Қасым-Жомарт Кемелұлы: «Расында, дарынға ие болу – бақыт. Бірақ жай ғана еңбексіз дарын жетістіктің кепілі бола алмайды. Дарын­ның көзін ашу керек және оны толығымен пайдалана білу қажет. Әр жеңіс, әр медаль тынымсыз ізденіспен, маңдай термен, үздіксіз да­йындықпен келеді» деген болатын. Дана халқымыз «Білім – тау­сылмайтын кен» деп бекер айтпаған. Қай заманда болсын елдің еңсесін тіктеп, болашағын баянды ететін күш – білімді ұрпақ. Сыр өңірінің ғана емес, күллі Қазақстанның мерейін үстем етіп жүрген өздеріңіздей талапты да талантты жастармен кездесудің мәні зор, – деді Мұрат Нәлқожаұлы.

Әрине, «Білімді ұрпақ – ел ертеңі» екені даусыз. Сырдариялық халықаралық, респуб­ликалық пәндік олимпиада және ғылыми жоба конкурстарының жеңім­паздары қатарында бірнеше оқушы бар. Мәселен, Ә.Жәмішев атындағы №129 мектеп-лицейінің оқу­шылары Мұхаммед Расул Әжібек пен Нуридин Орынбек халықаралық «Ғылым әлемін ашамыз» зерттеу жобасында жүлделі орындарға ие болып, ғылымға деген қызығушылықтары мен ізденімпаздықтарын дәлел­деді. Жас зерттеушілердің бұл жетістігі – сапалы білім мен жүйелі еңбектің нәтижесі. Ал №35 И.Тоқтыбаев атын­дағы мектеп-лицейінің оқу­шысы Ұлдана Тәліпова рес­публикалық ғылыми жобалар конкурсында жеңімпаз атанып, өз білімі­нің тереңдігін көрсетті. Ғылыми ізденіске бейім оқушының табысы өзгелерге үлгі болары сөзсіз. Т.Айтбаев атындағы №132 орта мектептің оқушысы Жания Қаймолдаева рес­публикалық «Ақберен» өнер байқауында жеңімпаз атанып, шығармашылық қа­білетімен көпшілікті тәнті етті. Осы білім ордасының оқушысы Жансая Бекболатова «ProEco» экологиялық жобалар байқауында үздік танылып, қоршаған ортаны қорғау бағытындағы тың бас­тамасымен ерекшеленді. А.Тоқмағанбетов атындағы №135 орта мектептің оқу­шысы Мәди Бердіхан оқу­шылар арасындағы рес­публикалық пікірсайыс тур­­нирінде ІІІ орын иеленіп, шешендігі мен сыни ойлау қабілетін жоғары деңгейде көрсете білді. №137 орта мектептің оқушысы Нұрали Нұрланұлы балалар музыка мектептері мен өнер мектептері оқушылары ара­сындағы республикалық фес­тиваль-байқауда жеңім­паз атанып, өнер саласындағы талантын дәлелдеді.

Оқушылардың әрбір жетістігінің артында білікті ұстаздардың қажырлы еңбегі мен бағыт-бағдары жатыр. Дарынды шәкірттерді биік белестерге жетелеген ұстаздар – Ғазиза Смағұлова, Әсел Көшербаева, Гүлзат Амангелдиева, Нүрия Мұзаппарова, Пакизат Әбдібекова және Салима Усманова екенін айта кетейік. Ұстаздардың кәсіби шеберлігі мен тынымсыз еңбегінің арқасында шәкірттер түрлі білім және өнер бәйгелерінде топ жарып келеді.

Салтанатты жиында 30 жетекші ұстаз облыс әкімінің Алғыс хатымен марапатталып, шипажайға жолдама алды. Халықаралық және республикалық білім додаларында үздік нәтиже көрсеткен 36 оқушыға облыс әкімінің Алғыс хаты мен планшет табысталды.

Айта кетейік, биылғы оқу жылында 29 оқушы халықаралық олимпиа­да­лар­дың жүл­дегері атанса, 143 оқушы республикалық олим­пиада мен ғылыми жоба байқауларында үз­дік нәтиже көрсеткен.