Ұмытылмас тарих, ұлықталған ерлік
Осы жылдың 2026 сәуірінде Чернобыль атом электр станциясындағы техногендік апатқа 40 жыл толғаны белгілі. Адамзат тарихындағы ең ірі радиациялық апатты жоюға 600 мыңнан астам адам қатысса, оның ішінде 32 мыңнан астам қазақстандық сарбаз бен маман болды. Бұл ретте «Руханият орталығында» Чернобыль апатының зардаптарын жоюға қатысқан ардагерлерге арналған тағылымды кездесу өтті. Оған аудан әкімі Берік Сәрменбаев, аудан әкімінің орынбасары Димаш Байдушев, аудан ардагерлері, мекеме басшылары, жастар және аудан тұрғындары қатысты.Кездесу барысында аудан басшысы 40 жыл бұрын орын алған апаттың себеп-салдарына кеңінен тоқталып, оның адамзат пен қоршаған ортаға тигізген ауыр зардаптарын атап өтті.
– Мемлекет басшысы Қасым-Жомарт Тоқаев «Біз Чернобыль апатының зардаптарын жоюға атсалысқан азаматтардың ерлігін әрдайым жоғары бағалаймыз. Олардың жанқияр еңбегі мен батылдығы – кейінгі ұрпаққа үлгі» деп атап көрсетті. Радиоактивті сәуленің аса қауіпті зардаптары мыңдаған адамның өміріне үлкен қауіп төндірді. Бұл апат табиғатқа да, адамзатқа да орасан зиян келтірді. Осындай ауыр кезеңде өз өмірін қатерге тігіп, апаттың зардаптарын жоюға қатысқан азаматтардың ерлігі өлшеусіз. Сіздер уақытпен санаспай, қауіптен тайсалмай, адамзат алдындағы борыштарыңызды жоғары қойдыңыздар. Бұл – шынайы патриотизм мен азаматтық жауапкершіліктің айқын көрінісі. Біздің ауданымыздан аталған апатты жоюға 43 азамат қатысса, бүгінгі күні олардың 12-сі ортамызда. Сіздердің ерліктеріңізді ұлықтау және оны жас ұрпақтың санасына сіңіру – аса маңызды міндет, – деді Берік Әбдіғаппарұлы.
Чернобыль апатының зардабын жоюға қатысқан ардагерлерге арнайы төсбелгі табысталып, сый-құрмет көрсетілді. Аудандық ардагерлер кеңесінің төрағасы Мұса Келдібаев сөз сөйлеп, Чернобыль апатының зардаптарын жоюға қатысқан азаматтардың ерлігі ешқашан ұмытылмайтынын тілге тиек етті. Зардапты жоюға қатысқан ардагерлер ұсыныс-пікірлерін жеткізіп, көрсетілген құрмет үшін алғыстарын білдірді.
– Чернобыль апаты – біздің жадымызда мәңгі сақталатын ауыр кезең. Біз, сол уақытта қызмет еткен ардагерлер, бұл қасіреттің салдарын жақыннан көрдік. Көзге көрінбейтін радиацияның қаупі қаншама адамның өміріне әсер етті, талай денсаулыққа зиянын тигізді. Сол бір сын сағатта көптеген азамат батылдық танытып, апаттың салдарын жоюға атсалысты. Біз үшін бұл – жай ғана міндет емес, ел алдындағы жауапкершілік еді. Қиындыққа қарамастан, әркім өз борышын орындауға тырысты. Бүгінде сол ерлікті ұмытпау – кейінгі ұрпақтың парызы. Чернобыль бізге бір нәрсені анық түсіндірді: бейқамдықтың салдары ауыр болады. Сондықтан табиғатқа, технологияға және адам өміріне әрдайым жауапкершілікпен қарауымыз керек. Бұл апат – тек өткеннің естелігі емес, ол болашаққа сабақ. Арамыздан талай азамат кеткені өкінішті. Әр жылдары қолдау көрсетіп келе жатқан аудан басшысына және баршаңызға алғыс айтамыз, – деді Темірбек Айкөпешов.
Балтабай ОРДАБЕКОВ
