Ойы ұшқыр, білімі терең жеңімпаз жас­тың еңбегін жоғары бағалаған ауыл әкімі Нұрлан Құрманалиев тарихы тереңде жатқан елді мекеннің логотипі бекітілгенін жақсы жаңа­лыққа балады.

– 1929-1950 жылдар аралығында сол жерде қаңлылардың «Майлы­құм» деген колхозы болған. 1950 жылы «Бидайкөл», «Майлықұм», «Қызы­л­орақ» колхоздары ұйым­дастырылып, 1962 жылы «Партияның XVIII съезі атындағы» совхоз болған ауылымыз қырғи тілді Асқар ақынның атымен аталады. «Ауылдың айшығы» ауыл логотипіне арналған онлайн бай­қаудың маңыздылығы жоғары. Талай дүл­дүлді дүниеге әкелген елді мекен­нің бойтұмары бекітілгеніне дән ризамыз. Ауылдық клуб­тың ұйым­дастыруымен жүзеге асқан бай­қау нәтижесінде Назарбаев зияткерлік мек­тебінің мұ­ғалімі Жанұзақ Темірбеков жеңіс тұғы­рынан көрінді. Білімі толысқан азаматтың шығармашылық еңбегін жоғары бағалаймыз, – деді Нұрлан Құрманалиев.

Логотип байқауының жеңімпазын анықтауға атсалысқан әділқазы алқа­сының құрамында ауыл әкімі Нұрлан Құрманалиев, ҚР Суретшілер одағының мүшесі, өлкетанушы Жәнібек Маханбет, Асқар Тоқмағанбетов атындағы №135 орта мектеп директоры Зәу­ре Білісбаева, суретші, кәсіпкер Нұрсұлу Ажарова, ауылдық ардагерлер кеңе­сінің төрағасы Ғабдолла Алданазаров, еңбек ардагерлері Бәрзубек Жыл­қыбаев, Манат Есенбаева, Злиха Сыздықова болды.

Бұл ретте, жеңіс тұғырынан көрініп, қар­­жылай сыйлыққа ие болған Жанұзақ Темірбеков логотиптің мазмұнына тоқталды.

– Асқар Тоқмағанбетов ауылы лого­типі – ауылдың тарихи, рухани және әлеуметтік құндылықтарын айшықтайтын біртұтас ком­по­зи­циялық белгі. Логотип дөңгелек пішінде бейнеленген. Дөңгелек – бірлік пен тұтастықтың, ынтымақ пен тұрақтылықтың нышаны. Бұл ауыл тұрғындарының татулығы мен ортақ мақсат жолындағы бірлігін білдіреді. Орталық бөлігінде орналасқан ауылға кірер қақпа береке мен бірліктің, қонақжайлылықтың, өткен мен болашақты жалғайтын жол, ауылдың дамуы мен ашықтығын білдіреді. Шаңырақ бейнесі – елдің тұтастығы мен ұлттық рухын білдіреді және ауыл тұрғындарының ортақ үйінің символы екенін меңзейді. Көк­тегі құстар бейнесі – тыныштық пен тату­лықтың, тазалық пен пәктіктің, жаңару мен болашақтың, арман мен үміттің символы. Ашық кітап – білімнің, ағартушылықтың және Асқар Тоқмағанбетовтің әдеби мұрасының белгісі. Бұл ауылдың рухани құндылықтарға және білімге деген құрметін айқындайды. Бидай масақ­тары – еңбек пен берекенің, ауыл шаруа­шылығының символы. Олар ауылдың негіз­гі тіршілік көзі мен молшылықты білдіреді. Жасыл түс – табиғат пен жаңаруды, қоңыр түс – жер мен тұрақтылықты, алтын түс – ырыс пен молшылықты білдіреді. Логотиптің жалпы мазмұны – білімге ұмтылған, рухани бай, еңбекқор әрі бірлігі жарасқан ауыл келбетін көрсетуге бағытталған. Байқаудың жеңімпазы атанғаныма шын жүректен қуаныш­тымын. Ауылдан түлеп ұшқан азамат ретінде бұл мен үшін зор мақтаныш, – деді Жанұзақ Темірбеков.