Диқандар арасында ақ егіс аталып кеткен бидай егу маусымы аяқталып, Сыр салысын егуге дайындық бас­­­талып кеткен. Биыл «Абзал және К» ТС мен «Мағжан және К» ЖШС 1100 гектар бидай еккен. Сәуір айының соңғы онкүндігінде басталатын күріш егу маусымына 450 адам сақа­дай сай. Техника сайланып, қазіргі уа­қытта жер тегістеу жұмысы жүргізілуде. Осы жылы жоспар бойынша 4000 гектар ал­қапқа күріш егу жоспарланған. Нағи Ілиясов ауылында диқандар 10 бригадаға бөлініп, еңбек етуде. «Янтарь», «Яхонт», «Маршал», «Лидер» секілді күріш түрін егетін шаруалар осы жылы да мол өнім алуға үмітті.

Мамыр айының со­ңында жоңышқаның ал­­­ғаш­қы орымы тү­седі. Шаруа­шы­лықта кү­­ріш пен жоңышқаны егу ба­рысын­да алмастыру тәжірибесі жүр­гіз­і­­леді. 3-4 жыл жоңышқа егілген жерге күріш дақылы себілсе, мол өнім беріледі. Ты­ңайған жердің құнары артып, күріштің сапалы өсуіне жағдай жасалады.

– Шаруашылықта техника қоры жет­кілікті. Ақ егісті орналастыруға 10 МТЗ трак­торы жұмылдырылды. Қазіргі уақытта егістік алқабында жер тегістеу жұмысы қарқын алды. Сала мамандары дамылсыз, демалыссыз дайындық жүр­гізуде. Көктемгі егіс науқанының табысты өтуі бірнеше факторға байланысты. Ең алдымен, жердің құнарлылығы мен ауа райы басты рөл атқарады. Сапалы тұқым, тыңайтқыштарды тиімді пайдалану, заманауи техникаларды қолдану да өнім көлемін арттыруға септігін тигізеді. Бүгінде аграрлық салада жаңа тех­нологиялар кеңінен енгізіліп, еңбек өнімділігі артып келе­ді. Таңның атысынан күн­нің батысына дей­ін тынымсыз еңбек еткен диқан қауымы әр­бір дәннен үміт күтеді. «Еңбек етсең ерінбей, тоя­ды қарның тіленбей» деген халық даналығы осы тұста айрықша мәнге ие. Көктемгі егіс – елдің азық-түлік қауіпсіздігін қамтамасыз ететін маңызды кезең. Диқандардың маңдай терімен келген өнім – халықтың ырысы. Сондықтан бұл науқанның әрбір сәті бағалы, әрбір еңбегі құрметке лайық. Берекелі көктем, мол өнім – баршаның ортақ тілегі, – деді шаруа­шылық төрағасы Дархан Ералиев.