Еxit-poll республикалық референдумның алғашқы қорытындысын жариялады
Республикалық референдумға келген көпшіліктің еліміз бойынша қарасы қалың болды. Жаңа Ата заңды қолдауға барған жұртшылық ел үшін маңызды бастаманың мән-мағынасын тереңнен ұғына білді. Таңертеңнен өз учаскелеріне барған ел халқы болашақ үшін жасалатын өзгерістерге жауапкершілікпен қарады.Саяси науқанға белсене қатысқан жұртшылық республикалық референдумның қорытынды нәтижелерін күткені мәлім. Дауыс беру уақыты ресми түрде аяқталғаннан кейін Exit-poll нәтижесін жариялады. Мәселен, еуразиялық интеграция институты жүргізген алғашқы Еxit-poll нәтижесіне сәйкес, республикалық референдумға қатысқан азаматтардың 86,7%-ы жаңа Конституция жобасын қолдап дауыс берген. Сауалнамаға ел бойынша 129 қала мен 71 ауылдан 30 мың азамат қатысқан. Институт мәліметінше, референдумдағы жалпы дауыс беру белсенділігі 75,3%-ды құрады.
Өз кезегінде «СОЦИС-А» кешенді әлеуметтік зерттеулер институты да зерттеу жүргізген. Айта кетейік, «Zakon.kz» сайтының тапсырысы бойынша сауалнама өткізген. Еxit-poll нәтижелеріне сәйкес, қазақстандықтардың – 87,4%-ы «Иә, қабылдаймын» деп жауап берген. Сонымен қатар «AMANAT» партиясы жанындағы Қоғамдық саясат институты өздері жүргізген сауалнама нәтижесін жариялады. Ел халқының 88,6%-ы «Иә, қабылдаймын» деп жауап бергендер қатарында.
Референдум – ел ертеңін бірге айқындайтын тарихи мүмкіндік. Сондықтан әрбір азамат осы маңызды сәтте белсенділік танытып, өз таңдауын жасағаны мәлім. Халықтың дауысы – мемлекеттің болашағы екенін ұмытпаған жұртшылық қоғамдық-саяси үдерістерге ерекше белсенділікпен келді. Халықтың бірлігі мен белсенділігі – еліміздің тұрақты дамуының басты кепілі.
Б.АЯБЕКҰЛЫ
