«Мемлекет басшысының өкімімен Елнұр Сабыржанұлы Бейсенбаев Қазақстан Республикасы Президенті Әкімшілігінің Ішкі саясат бөлімінің меңгерушісі лауазымына тағайындалды», – деп жазды Ақорда.

Айта кетейік, бұған дейін Елнұр Бейсенбаев жаңа Конституция «мәңгілік билікке» жол бермейтінін айтқан еді.

2008 жылы әл-Фараби атындағы Қазақ ұлттық университетін «Саясаттану бакалавры» мамандығы бойынша тәмамдады, ал 2010 жылы осы университеттің магистратурасын "Саясаттану магистрі" мамандығы бойынша бітірді.

2006-2012 жылдары «Жастар Үні» қоғамдық бірлестігінде түрлі басшылық қызметтер атқарды, оның ішінде ұйымдастыру бөлімінің кеңесшісі және жастар қанатының төрағасы болды. 2012–2015 жылдары Алматы қаласындағы №48 мектеп-лицейінде тарих пәнінің мұғалімі болып еңбек етті, сондай-ақ Қазақстан Коммунистік халық партиясының Алматы қалалық филиалы қоғамдық бірлестігінде идеология және үгіт-насихат жөніндегі хатшы қызметін атқарды.

2015-2017 жылдары Алматы қаласының жастар саясаты мәселелері басқармасында жастар жобалары және ұйымдастыру жұмысы бөлімін басқарды, кейін аталған басқарманың басшысы болды.

2017-2018 жылдары Абай атындағы Қазақ ұлттық педагогикалық университетінде тәрбие, әлеуметтік жұмыс және жастар саясаты департаментінің директоры қызметін атқарды.

2019-2020 жылдары Елнұр Бейсенбаев Нұр-Сұлтан қаласы әкімінің кеңесшісі болды, ал 2020-2021 жылдары Jas Otan жастар қанатының төрағасы қызметін атқарды.

2021-2023 жылдары Қазақстан Республикасы Парламенті Мәжілісінің VII шақырылымының депутаты болып, әлеуметтік-мәдени даму комитетінің құрамында жұмыс істеді.

«AMANAT» партиясының атқарушы хатшысы.

2023 жылғы 28 наурыздан бастап «AMANAT» партиясының партиялық тізімі бойынша Қазақстан Республикасы Парламенті Мәжілісінің VIII шақырылымының депутаты.