Мемлекет басшысы Қасым-Жомарт Тоқаев Ұлттық құрылтайдың V отырысында сөйлеген сөзінде автокөлік жол­дарын халықаралық стан­дарт­тарға сай жаңғырту – елдің транзиттік әлеуетін арттырудағы айрықша міндет екенін мәлімдеді.

«Жақында Қызылорда – Жез­қазған жолының Қызылордаға тиесілі бөлігі салынып бітті. Жыл соңына дейін Ұлытау облысындағы бөлігіндегі көлік қозғалысы толық ашылады. Жолдың жалпы ұзындығы – шамамен 400 шақырым» деді Мемлекет басшысы. Сонымен қатар биыл Қазақстанда бұрын болмаған ауқымы кең инфрақұрылымдық жобалар басталмақшы.

Осы ретте, «Батыс Қытай – Батыс Еуропа» авто­дәлізінің Қызылорда мен Ақтөбе аралығындағы бөлігін де айтты. Яғни жолдың тарлығының салдарынан жол апатының жиі орын алуына байланысты ар­найы тапсырма берді. Биылғы жылы аталған жолды төртжолақты етіп жаңа күрежол құрылысы басталады. Ал көптің көкейіндегі қазіргі жол бөлігі тиісінше облыстың ішкі жолы болып қалатыны қуанышты жағдай. Бірқатар жол­ға байланысты жоба­ның жұмысы сапалы әрі уақы­тылы орында­луын Президент өз бақы­лауында ұстайтын болады.

Құрылтайда елді елең еткізген жаңалық қатары көп болды. Соның ішінде, жаңа Парламенттің ата­уын «Құрылтай» деп атауды ұсынды.

Президент Қасым-Жомарт Тоқаев Қызылордаға ке­ліп тұрып, Арал мәселесін айналып өту мүмкін емес еке­нін айта отырып, «Аралды құтқару – барша адамзат үшін әлі де өте өзекті міндет» деді.

Дегенмен жүйелі іс-шараның арқасында сол­түстік Аралды сақтап қалу мүмкін болды. Қашқан теңіз қай­та оралып, кіші Аралдың деңгейі біртіндеп көтеріле бастады. Енді Көкарал бөгетін биіктету мәселесі күн тәртібіне шықты. Президенттің айтуынша, жоба жыл­дың соңында басталып, кіші Аралдағы су көлемін едәуір арттыруға мүмкіндік береді.

Жалпы, Қызылордада өткен Ұлттық құрылтайда ел болашағына тікелей әсер ететін өзекті тақырыптар қоз­ғалды. Соның ішінде жоғарыда айтқан Арал мәселесі – экология, денсаулық, қауіпсіздік пен халықаралық жауап­­кершілікті тоғыс­тырған аса маңызды түйін ретін­де айқын көрінді.