Елді елең еткізген оқиғалар қандай?
Басылымның мазмұнын байытып, ойлы оқырманға тұщымды ақпарат ұсыну – шығармашылық топтың мақсатты түрде жүзеге асыратын қызметі. Күнделікті елімізде және әлемде болып жатқан елеулі оқиғалардың басым бөлігі көпшілік назарынан тыс қалмауда. «Шартарап» атты жаңа айдар аясында әр апта сайын жұртшылықты бейжай қалдырмаған маңызды жаңалықтарды назарларыңызға ұсынып отыруды жөн көрдік.Ең алдымен, өткен аптада қазақстандықтардың басым бөлігінің талқысына түскен оқиға Атырау облысындағы ерлі-зайыптының қазасы болатын. 2025 жылдың соңында белгісіз жағдайда жоғалып кеткен отбасының өліміне олардың күйеу баласының қатысы болуы мүмкін деген дерек бар. Ресми түрде ішкі істер органдарының мамандары күдіктіге іздеу жариялады.
Жұртты елең еткізген тағы бір оқиға – өткен жылы күйеуінің қолынан қаза тапқан Айзат Жұманованың ісіне нүкте қойылды. 32 жастағы келіншектің жолдасына сот қатаң үкім шығарып, темір торға тоғытты.
Жылдың басы қазақ мәдениеті мен кино саласын орны толмас қазаға ұшыратты. Актер Мұрат Бисембин 53 жасында өмірден озды. Талантты әртіс қалың көрерменіне «Рэкетир» және «Ағайынды», «Томирис» фильмдеріндегі рөлдері арқылы танылған. Негізінен, ол – Сыр елінің тумасы.
Айтпақшы, Астана қаласының ауданаралық қылмыстық соты Тотақановтарды баласын емдеу мақсатында жиналған қайырымдылық қаражатты жымқырғаны үшін кінәлі деп таныды. Ерлі-зайыптыны 7 жылға бас бостандығынан айыруға үкім шығарды. Сондай-ақ мүлкін тәркілеп, 10 жыл қайырымдылықпен айналысу құқығынан айырды. Ерлі-зайыпты әлеуметтік желі арқылы 2,2 млрд теңге қаражат жинаған. Оның 1,4 млрд теңгесі қайырымдылық ретінде алынғанымен, тек 6,4 млн теңге ғана баланың еміне жұмсалғаны анықталды.
Еліміздің спорт саласында бірқатар өзгерістер орын алды. Мәселен, олимпиада чемпионы Ольга Рыпакова Қазақстан жеңіл атлетика федерациясының президенті қызметінен кетті. Оның орнына «ҚазМұнайГаз» төрағасы Асхат Хасенов тағайындалды. Өткен жылы бокстан ел күтпеген нәтиже тіркеген ерлер құрамасының бас бапкері Қайрат Сәтжанов денсаулығына байланысты құрама тізгінін ұстаудан бас тартты. Жаңа бапкер болып 2024 жылдың тамыз айынан Ұлттық құраманың жаттықтырушысы қызметін атқарған Нұржан Насанов келді. Қазіргі уақытта барлық спорт жанкүйерінің назары допинг дауына іліккен Жәнібек Әлімханұлының алдағы мансабына байланысты шешімге ауып отыр. Әлем чемпионы Жәнібек Әлімханұлының допинг дауына байланысты тәртіптік істің қорытынды тыңдауы 19 қаңтарға белгіленді. Жиында 8 қаңтарда ашылған В допинг-сынаманың талдау нәтижелері ресми түрде жарияланады.
Әлем бойынша көптің талқылауына түскен жаңалықтар тізімінде Ирандағы толқулар басты орынға шығып отыр. Ирандағы наразылық іс-шараларының соңы саяси дағдарысқа ұласуда. Қалаларда жаппай қақтығыстар орын алып, қаза тапқандар көбеюде.
Қазақстандық саяхатшы және блогер Дастан Мұхамедрахим америкалық әртіс Уилл Смитке ұлттық шапан тарту етсе, әлемнің қырыққа жуық елінде «Nestlé» компаниясының балалар тағамы дүкен сөрелерінен алынып тасталуда. Олардың қатарында Қазақстан да бар. Бұған себеп – бір мезетте өндірілген өнімдерде адам ағзасына қауіпті цереулид токсині болуы мүмкін. Дәрігерлердің айтуынша, бұл токсинді бөлетін Bacillus cereus бактериясы қайнату немесе қайта қыздыру кезінде жойылмайды.
Сыр өңірінің басты футбол командасы «Қайсар» клубы Біріккен Араб Әмірлігінде оқу-жаттығу жиынын өткізуде. Айта кетейік, «Қайсар» клубы жаңа логотипін бекітті.
Міне, біз өткен аптада отандық БАҚ-та жарияланған жаңалықтарға шолу жасадық. Алдағы аптаның маңызды оқиғаларын біздің басылымнан күтіңіз.
Дайындаған
Балтабай ОРДАБЕКОВ
