Аударымдар есепшотқа түсе бастайды
«Ұлттық қор – балаларға» жобасы 2024 жылдың 1 қаңтарынан бастап іске қосылғаны мәлім. Сол жылдан бастап кәмелетке толмаған әрбір қазақстандық Ұлттық қордан өз үлесін алуға құқылы. Міне, биыл үшінші рет жыл басында 18 жасқа дейінгі балалардың шотына Ұлттық қордан қаражат аударылады деп күтілуде. Бұл қаражатты «нысаналы жинақ» деп атайды.Ресми мәліметке сәйкес 2025 жылға арналған мақсатты талаптар мен оған есептелетін инвестициялық табыс 1 ақпанға дейін балалардың шотына аударылады. 2008 жылы дүниеге келген балалар биыл 18 жасқа толады. Олардың жинағы да 1 ақпанға дейін жинақ шотына түсіп болады.
Барлық балаға аударылатын қаражаттың дені Ұлттық қордың инвестициялық табысының 50 пайызынан құралатынын біліп жүрген абзал. Сол табыс барлық балаға тең бөлінеді.
Өткен жылдары әр балаға есептелген қаражат Ұлттық қордың актив құрамында қала береді және одан әрі инвестицияланады. Сол арқылы оған қосымша табыс есептеле береді. 18 жасқа толмай ол қаражатты мерзімінен бұрын алу мүмкін емес. 18 жасқа толғаннан кейін жинақты екі мақсатта ғана пайдалануға болады. Оның бірі – тұрғын үй жағдайын жақсарту үшін және екіншісі – білім ақысын төлеу үшін. Егер жинақтың иесі қайтыс болса, жиналған қор Қазақстан заңнамасына сәйкес мұрагерлікке өтеді.
Әрбір ата-ана осы ретте нені білуі керек? Ұлттық қордың ақшасына иелік ету үшін әр ата-ана немесе заңды өкіл баланың жеке басын куәландыратын құжаты мен ЖСН-і бар-жоғын тексеріп қойғаны дұрыс. Егер әлі алынбаған болса, рәсімдеу керек. Сосын баланың жеке басының деректері – аты-жөні, туған күні, ЖСН, азаматтығы дұрыс жазылған ба, оны да тексеріп қойған артық емес.
Ол үшін онлайн eGov порталына кіріп, жеке кабинеттегі «Цифрлық құжаттар» бөлімінен бала туралы мәліметтің бар-жоғын біле аламыз. Егер баланың жеке куәлігі немесе ЖСН болмаса – тұрғылықты мекенжайға қарай ХҚКО-ға жүгіну керек. Ал азаматтығы көрсетілмесе немесе қате жазылса – көші-қон қызметіне бару керек.
Айту керек, жиналған қаражатты мерзімінен бұрын шешіп алуға тыйым салынады. Шоттағы ақша доллармен есептеледі және 18 жасқа толғанда доллармен беріледі.
Ұлттық қордың қаражатына салық салынбайды. Бала 18 жасқа толғанға дейін жинақталған қаражат Ұлттық қорда сақталады және оны Ұлттық банк түрлі қаржы құралдарына инвестициялайды.
Жоғарыда айтып өткеніміздей одан түскен инвестициялық табыс та балалардың шотына қосымша түсіп тұрады.
Әр жылдың 20 қаңтарына дейін бағдарламаға қатысатындардың соңғы тізімі жасалып, 31 қаңтарға дейін шотқа ақша аударылады.
Бибісара ЖАНӘЛІ
