Музей үздігі
Ауданның мәдениет саласы жылды табысты да жемісті қорытындылауда. Ауданның руханиятын танытып, музей жұмысын жандандырып, бірнеше жылдан бері жемісті еңбек етіп келе жатқан аудандық тарихи-өлкетану музейінің ғылыми қызметкері Әкімжан Әжікенов облыстық байқауда «Үздік музей қызметкері» атанды.Бұл байқау Жаңақорған аудандық «Руханият» орталығында өтті. Музей саласы мамандарының кәсіби шеберлігін арттыру, ғылыми-зерттеу жұмыстарына ынталандыру және шығармашылық әлеуетін дамыту мақсатында өткен байқауда үздік нәтиже көрсеткен сырдариялық жас ғылыми қызметкер кәсіби біліктілігін көрсетті.
– Жыл сайын ұйымдастырылатын бұл байқау барысында музей қызметкерлері өздерінің кәсіби білімін, жинақтаған тәжірибесін, жаңашыл көзқарасы мен шығармашылық мүмкіндіктерін жан-жақты таныстырып, саладағы үздік тәжірибелерін ортаға салды. Ауқымды іс-шара музей ісін дамытуға, кәсіби ынтымақтастықты нығайтуға және тарихи-мәдени мұраны насихаттауға зор ықпал етті. Байқауда қасиетті өлкеміздің тарихи көне орындары туралы арнайы жазылған зерттеуімді көрсеттім. Еңбегім қазылар алқасы тарапынан жоғары бағаланып, биылғы жылдың «Үздік музей қызметкері» атағын бергеніне қуаныштымын, – дейді өз ісінің маманы Әкімжан Ержанұлы.
Руханият саласын дамытуға үлес қосып жүрген, музей қызметкерлері сынға түскен байқауда «Шынайы шедевр», «Зерттеу ісінің үздігі», «Креативті маман» номинациясы да табысталды. Бұл марапат музей қызметкерлеріне музей қорын сақтау мен экспозицияларды мазмұнды әрі сапалы ұсынудағы жауапкершілігі үшін берілді. Сонымен қатар өлкетану саласындағы ғылыми ізденістері мен тың деректерді ғылыми айналымға енгізудегі белсенділігі үшін лайықты деп танылды. Жалпы музей қызметін жаңаша форматта дамытуға бағытталған шығармашылық бастамалар да қазылар алқасының назарынан тыс қалмады.
Байқау қорытындысында жеңімпаздар мен номинация иегерлері ақшалай және бағалы сыйлықтармен марапатталды.
Айта кету керек, сырдариялық ғылыми қызметкерге бұл марапат музей ісіндегі жоғары кәсіби біліктілігі, ғылыми-зерттеу бағытындағы жүйелі еңбегі және тарихи-мәдени мұраны сақтауға қосқан елеулі үлесі үшін табысталды.
«Тт» ақпарат
