Жігерлі жастар ел мүддесін жоғары қояды

Жыл сайын Сырдария ауданында жастар форумы өткізіліп, үздіктер анықталады. Сан салада қызмет етіп, өз ісінің білгірі атанған жастар аудан абыройын биіктетіп, өзара даралануда. Биыл XVII жастар форумы өз жұмысын бастап, жетістік жолында жігерленген болашақтың тұтқасын ұстайтын өрендер көкке өрлей түсті. «Жұмысшы жастар: Еңбек және инновация» тақырыбындағы форумға аудан әкімі Берік Сәрменбаев, мәслихат төрағасы Ержан Әжікенов, аудандық мәслихат депутаты Алмас Есназар, зиялы қауым өкілдері, облыстық жастар ресурстық орталығының мамандары мен Жалағаш ауданынан келген арнайы қонақтар қатысты.

Форумның алғашқы бөлімі «Руханият орталығында» басталды. Мұнда мемлекеттік жастар саясатын жүйелі түрде жүзеге асырып келе жатқан Сырдария аудандық жас­­­тар ресурстық орталығының жұ­­­мысы аудан басшысына таныс­ты­рылды. Аудан әкімі Берік Әбдіғаппарұлы мәслихат төрағасы Ержан Әжікеновпен бірге арнайы ұйым­­дастырылған көрме барысында жастармен пікірлесті. Осы уақытқа дейін жетістікке қол жеткізе білген жастардың жобасына жоғары баға берді. Республикалық, халықаралық дәрежеде аудан атын шығарып жүр­ген жалынды жастардың алға қойған мақсат-міндеті айқын.

Өз кезегінде форум жұмысы аудандық мәдениет үйінде жалғасын тапты. Келелі жиынды ашқан аудан басшысы Мемлекет басшысы Қасым-Жомарт Кемелұлы Тоқаевтың жыл сайынғы Жолдауларында жастар сая­­сатына айрықша мән беріліп, жас ұрпақтың білім алуы, денсаулығын нығайтуы және жан-жақты дамуына бағытталған нақты тапсырмалар жүк­теліп келе жатқанын атап өтті. Президент тапсырмаларына сәйкес, облыс әкімі Нұрлыбек Машбекұлы Нәлібаевтың қолдауымен Сыр өңі­рінде, оның ішінде ауданда жас­тарға арналған бірқатар жүйелі жұмыстар жүзеге асырылып жат­қанын тілге тиек етті.

– Биыл Тереңөзек кентінде аймақ басшысының бастамасымен «Руханият» орталығы пайдалануға берілді. Аталған орталықта жастар орталығы мен неке сарайы орналасып, жас буынның тәрбиелік, рухани және әлеуметтік дамуына қолайлы жағдай жасалуда. Сонымен қатар, Тереңөзек кентінің көрікті аумақтарының бірінде «Жастар» аллеясы салынды. Ауданда жастардың еңбекке баулынуына ерекше назар аударылуда. Қазіргі таңда ауданға қарасты 6 ауылда жастар бригадалары ресми түрде егін егу жұмыстарымен айналысып, 60 гектар жерге бақша дақылдарын егіп, оң нәтижелерге қол жеткізді. Бұл – жастардың адал еңбекке деген жауапкершілігі мен белсенділігінің айқын көрінісі. Жастарды әлеуметтендіру және жұмыспен қамту мақсатында «Мүм­кіндіктер алаңы» атты жылжымалы жәрмеңке ұйымдастырылып, жұмыссыз жастарды қолдауға бағыт­талған «Үздік бизнес идея» жобалар байқауы өткізілді. Аудан жастары мемлекеттік қызмет, білім, мәдениет, ғылым және спорт салаларында жоғары жетістіктерге жетіп келеді. Жерлесіміз, жас ғалым, Гонконг кванттық офтальмо­логия зертханасының басшысы Мұхит Құлмағанбетов Гонконгтың ақпарат­тық және коммуникациялық технологиялар саласындағы сый­лығында үлкен жетістікке жетіп, «Ғылыми Оскарды» жеңіп алып, халықаралық деңгейде зор жетіс­тікке қол жеткізді. Сонымен қатар, 17 жастағы жерлесіміз Асылжан Абдуллаев өкпе қатерлі ісігін ерте анықтауға бағытталған жасанды интеллект негізіндегі «Cortex AI» стартап жобасын әзірлеп, меди­циналық диагностика саласына тың жаңашылдық енгізуде. Спорт сала­сында да аудан жастары биік белестерді бағындыруда. Алматы облысы, Талғар ауданында өткен қол күресінен жастар арасындағы Қазақстан Республикасының чемпионатында 60 келі салмақ дәрежесінде сыр­дариялық Самат Нұрсәт чемпион атанды, – деді аудан басшысы.

Форум қорытындысында мемле­кет­тік жастар саясатын іске асыруға елеулі үлес қосып, аудан көлемінде белсенді қызмет атқарып жүрген 10 жасқа аудан әкімінің «Өрлеу» жастар сыйлығы мен 100 000 теңге көле­міндегі қаржылай сертификат табысталды. Олардың қата­рын­да әскери, құқық қорғау саласынан Асылжан Сақыбеков, өнер мен мәдениеттен Толғанай Мұратқызы, кәсіпкерліктен Зіннәт Маткаримова, білім және ғылымнан Заманбек Аманбеков, спорттан Данияр Жүсіпбаев, денсаулық сақтаудан Динара Тұрлығұлова, бұқара­лық ақпарат құралдарының өкілі­нен Таңшолпан Шанжарханова, волонтерлік ұйымнан Мұхамед Сейілханов, үздік жұмысшы маман ретінде Дастан Байжүнісов бар. Ал «Жыл волонтері» номинациясына Еркебұлан Басалқаев, Сұңғат Раушанбеков, Қуаныш Сайран, Мақсат Бекенов, Айгерім Үсенова ие болды. Жыл үздігі ретінде Перизат Асқарова, Жаңабай Арғынбай, Исабек Алтынбайұлы, Мөлдір Серікбай, Нұрдаулет Нұрзылда, Гүлбаршын Ешпанова, Ақжарқын Шахманова, Нұркен Жұмашев, Толғанай Айниязова, Жасұлан Кеңес, Оразкүл Сейтакбарова танылды.

Форум аясында жастарға ар­налған ерекше әрі көңілді кеш ұйым­дастырылды. Кештің тізгінін креативті шоумен Жаңабай Сақ­тағанұлы алып, қатысушыларға кө­теріңкі көңіл күй сыйлады.

Бағдарлама барысында түрлі қызықты ойындар ойнатылып, жастар белсенді түрде атсалысты. Әсіресе, алғырлығы мен белсенділігімен көзге түскен қатысушылар бағалы сыйлықтарға ие болды. Кеш жас­тар үшін есте қаларлық әсер мен жағымды эмоцияға толы болды. Сонымен бірге аудан өнерпаздары көпшілікті өнерімен тәнті етті.

Б. ОРДАБЕКОВ