Енді міне, жақында ауыл орта­лы­ғынан жаңадан салынған балалар ойын алаңы пайдалануға берілді. Бұл ауылдағы жалғыз ойын алаңы емес. Жыл басында Абай Құнанбайұлының туғанына 180 жыл толуы қарсаңында ауылдағы Абай көшесінде жаңа алаң салынып, көптен күткен жақсы жаңалық болған еді. Енді міне, тағы бір нысан ауыл көркіне ажар беріп, оның қуанышын барша ауыл халқы болып атап өтті.

Ауылдық округтегі жаңа бала­лар алаңының ашылуына ауыл әкімі Нұрлан Құрманәлиев, ауылдық ар­да­герлер кеңесінің төрағасы Ғабдолла Алданазаров, ардақты ардагерлер мен балалар қатысты. Ауыл үлкендері жаңа алаңның лента қию рәсімін өткізіп, ауыл тұрғындарын қуа­ны­шымен құттықтады.

– Заманауи үлгіде сапалы құрылыс заттарынан салынған ойын алаңы – ауыл балалары үшін қуанышты жаңалық. Еліміздің келешегі – бүгінгі ойын балалары. Сондықтан оларға бүгінгі күні дұрыс тәрбие беріліп, шынығып, шымыр болуына жағдай жасауымыз керек. Ойын алаңына орна­ластырылған жабдықтардың бәрі жоғары сапалы және қауіпсіздік те ескерілген. Енді жас жеткіншектер кез келген жерде ойнамайды, олар осы жерге келіп, ойнайтын болады. Балаларға қуаныш сыйлаған мерді­герге айтар алғысымыз мол, – дейді ауыл әкімі Нұрлан Құрманәлиев.

Жаңадан салынған ойын ала­ңы балалардың қауіпсіздігі мен бел­сенді демалысын қамтамасыз ету мақ­сатында заманауи талаптарға сай жабдықталған. Алаңда әртүрлі жас санатындағы балаларға арналған сыр­ғанақ, әткеншек, өрмелеу кешені және дене шынықтыруға арналған шағын спорт құрылғылары орнатылған. Жаб­дықтар жарқын түстермен боялып, жасанды төсеніш жасалған. Бұл балалардың алаңсыз қауіпсіз ойнауына мүмкіндік береді.

– Қасиетті топырақта туып-өскен кішкентай балаларымыздың шатыққа толы күлкісі мен ойынға толы күндері үшін жасалған алаң. Бұл ауылдың келешегі үшін тағы бір жарқын қадам. Ата-ана үшін баласының қуанышты жүзін көруден асқан қандай бақыт бар?! Ауылымыздан тағы бір ойын алаңы ашылып, балалардың қуанышында шек жоқ. Әткеншек, сыр­ғанақ, барлығы керемет. Еліміздің көк Туын желбіреткен небір батырларымыз осындай кішкентай ауылдардан шыққаны мәлім. Қазір балалар көбіне телефонға әуес деп жатамыз. Сондықтан ата-ана балаларын бір сәт сыртқа шығарып, осында әкелсе. Өйткені далада ойын ойнаған бала шымыр болып өседі. Осында неме­релерімізді бір мезгіл әкеліп ойнатамыз, – дейді ризашылығын білдірген еңбек ардагері Зылиха Сыздықова.

Ауыл тұрғындары жаңа ойын ала­ңының ашылуын ерекше қуа­ныш­пен қабылдады. Бұл нысан бала­лардың уақытын тиімді өткізіп, олардың дене дамуына, достық қарым-қатынасты нығайтуына және бойындағы шығар­машылық қабілетін дамытуына жағдай жасайды.