Бұған дейін бірнеше аттың бабын тауып, бәйгеге қосқан атбегінің қорасында бүгінде асыл тұқымды «Лашын» сәйгүлігі байланып тұр. Негізінен Марат Әбдікәрімұлы – отба­сындағы 9 ағайындының үлке­ні. Бауырларына болыса жүріп, еңбекке ерте араласқан. Мал шаруа­шылығына бейімделіп, жылқы борда­қылап, атбе­гі­лікті қатар алып жүрген жан. Бізбен сұхбат кезінде жігіттік шағын­дағы шабандоздық өнерін қызы­ға еске алды.

– Ту биедей текті, тұлпардай тегеу­рінді болу – әрбір шабандоздың арманы, басты мақсаты. Шапшаң, батыл, қайратты бола отырып, ат құлағында ойнау арқылы өзімізді жеңіске жетелейміз. Өзім 12 жыл бойы бәйгеге шаптым. Бірнеше мәр­те республикалық деңгейде топ жарып, 86 шабандоздың ішінен бас бәй­геге қол жеткіздім. Мерейім тасып, автокөлік кілтін алған сәтім әлі есімде. Бұл оқиғаға 43 жыл өтсе де, жүйріктер қатарынан көрінгенім – мен үшін үлкен мақтаныш. «Жасмин» атты атым талай мәре сызығын бірінші болып кескен еді, – дейді тәжірибелі атбегі.

Қазіргі уақытта атбегілік жұмысты Мәкеңнің ұлы Нұрбек атқарып жүр. «Лашынның» бабына қарап, бәй­геге қосуға барынша күш салады. Әкесі­мен ақылдаса отырып, аттың жүріс-тұрысын бақылайды. Бүгінде «Лашынды» бәйгеге алып шығатын шабандоз ретінде Рахман Дарханұлы таңдап алынған. Ол күнделікті 4-9 ша­қы­рым аралығындағы қашықтықта жылқыны дайындайды. Жем-суын мөлшермен беріп, дәруменін уақы­тылы береді. Бір жағынан табыс көзі болса, екінші жағынан сүйікті ісіне айналған атбе­гіліктің өзіндік машақаты жеткілікті.

– «Лашынды» өткен жылы Ресей­дің Самара қаласынан әкелдім. Бір жыл ішінде бірнеше жарысқа қатысып үлгерді. Бәйгеге шабар алдында күтімді азайтып, жаттығуды күшейтеміз. Уақытылы демалдырып, бал беріп, пайдалы дәрумен қосамыз. Осыған дейін екі бәйгеден ІІ және ІІІ орынды иеленді. Алдағы уақытта «Лашыннан» үлкен үміт күтеміз, – деді Марат Қалиев.