Өнерін ұстаздықпен ұштастырған Қалдыгүл Жұмаділдаева бала кезінен музыкалық аспаптарға жаны құмар болған. 11 жасында домбыра сыныбына барып, алғаш рет нота үйреніп бастаған. Одан кейін студент шағында қобыз аспабын үйреніп, қызы­ғушы­лығы артқан. Музыкалық училищені аяқтаған кейін туған жеріне қызмет етуге Аманкелді ауы­лына келеді. Осы жақта 2-3 жыл өнер мектебінде қызмет атқарып, мектеп жұмысын тоқтатқаннан кейін қаладағы музыкалық колледждің оркестр қатарына қосылады. Көп ұзамай Қорқыт ата атындағы Қызылорда мем­лекеттік университетінде қобызшы білімін жалғастырады. Жоғары оқу орнын үздік аяқтағаннан кейін қайта Аманкелді ауылына еңбек етуге бет бұрады.

– Оқуымды тәмамдағаннан кейін қайта туған жеріме оралдым. Өнер мектебі қайта жанданған шағы. Қобыз аспабын үйрету бойынша сабақ бере­мін. Ауылдың әр баласы талантты. Үйреткен оқушыларым бірте-бірте жетіс­тіктерге жетіп, шыңдалуда. Ал­ғаш­қылардың қатары болып, 2019 жылы оқушым Шідебай Қалима Алматы қаласында өткен жас музыканттар республикалық конкурсына қатысып, жүлделі І орынды жеңіп алды. Бұл оқушым қазір музыкалық колледждің 4-курсында прима қобыз аспабын оқып, жалғастырып жатыр, – дейді қобызшы Қалдыгүл.

Өз өнерін оқушыларымен бірге шыңдап жүрген аспап шеберінің қазір­гі таңда талантты оқушылары аз емес. Осы жақында екі қобызшы шәкірті жетістікке жетіп аудан абыройын асқақтатты. Жас музыканттар конкурсының аудандық кезеңінде Айару Сейілхан бас жүлдені, Динара Нұрланқызы І орынды жеңіп алған. Екеуі де республикалық кезеңге тікелей жолдама алып, конкурс онлайн форматта өткен. Жұмыстарын бейнеролик­ке түсіріп жолдаған. Нәтижесінде Айару Сейілхан республикалық кезеңнен жүлделі ІІІ орынды иеленіп, тәлім­герінің үмітін ақтады. Бұл Қалдыгүл Жұма­діл­даеваның оқушы­ларымен жет­­­кен жетістіктерінің бір бөлігі ғана. Осын­дай талантты жас өнерпаздарды дайындау үшін ең алдымен мықты күш-жігер керек. Баланың өнерге деген сүйіспеншілігін аша білген ұстаз әрдайым құрметке лайық. Осы тұста бірнеше жылдар бойы ұстаз­дық етіп келе жатқан Қалдыгүл Сейілханқызының өз алдына жеке дара жеткен жетістіктері де ауыз толтырып айтарлықтай. Аудандық «Құрақтың Досжаны» оркестрімен бірге өнер көрсетеді. Сондай-ақ облыстық филармонияда «Тұрмағамбет» оркестрінде қобызшы. Осы жақында өткен облыс­тық «Алтын күз» мерекесінде облыс әкімі Н.Нәлібаевтың «Алғыс хатымен» марапатталған. Аудан әкімі, аудандық білім бөлімінен де марапаттары аз емес.

– Осы қобыздың арқасында Қазақстанның көп қаласын араладым. Тіпті шекара асып, Оңтүстік Кореяға екі рет, Өзбекстан астанасы Ташкентте болдым. Екі ұлым бар. Бірі әскери салада қызмет етсе, екіншісінің таңдаған мамандығы – медицина. Екі ұлымда өнерге жақын, – деді қобызшы.

Өнерімен елді сүйсінткен, білгенін оқушыларымен бөліскен Қалдыгүл Жұмаділдаева талантымен де, білім беру жолындағы өшпес ізімен де мықты тәлімгер. Өйткені қазақтың қобызын жұрт­шылыққа танытып, біршама өнер­лі жас ұрпақты тәрбиелеуде. Оның бұл салаға сіңірген еңбегі орасан зор.