Ұстаз – адам өміріндегі ең қас­терлі тұлғалардың бірі. Ол білімнің шамшырағы, тәрбиенің темірқазығы. Әрбір жетістікке жеткен азаматтың артында оны білім нәрімен сусындатқан, жол көрсеткен ұстазы тұрады. Олардың кез келген жетістігі, әріп үйреткен мұғалімінің еңбегі.

Іс-шараны аудандық білім бөлімі­нің басшысы Еркебұлан Жақып пен білім қызметкерлері кәсіподағы коми­тетінің төрағасы Алмас Есназар ашып, ардагерлерді қос мерекемен құт­тықтады.

– Ұстаз еңбегі – ұлы еңбек. Ол шәкірт жүрегіне ізгілік пен мейірім дәнін себеді, болашаққа бағыт береді. Бала бойындағы қабілетті ашып, дарынын дамытуға көмектеседі. Қазан айының алғашқы мерекесі «Қарттар күнімен», сондай-ақ «Ұстаздар күні­мен» шын жүректен құттық­таймын. Ауданға қарасты әр мектеп қабырғасында жылдар бойы еңбек етіп, білім саласының дам­уында айрықша рөл атқардыңыздар. 90-жылдардағы қиын кезеңді мо­йымай өткеріп, білім ордасын сақ­тап қалдыңыздар. Әрқайсысыңыздың қос­­қан үлестеріңіз айрықша. Бүгінде ауданға қарасты мектептер кезең-кезеңімен күрделі жөндеуден өтіп жатыр. Бұл әрине, қазіргі таңда педа­гогтардың жайлы мектепте білім беруін қамтамасыз ету мақсатында орындалуда. Шәкірттеріңіз қай сала болсын адал еңбегімен нәпақасын тауып, жетістікке жетуде. Бұл әрине, сіздердің әр оқушыға қалыптастырған іргетасының мықты болуы, – деді Еркебұлан Жақып.

Әрі қарай кеш әуез мектебі ұстаз­дарының ән шашуымен жалғасып, ақ самайлы әжелер мен қарияларға көтеріңкі көңіл күй сыйлады. Мерекелік іс-шарада ардагер ұстаздар ақ тілегін айтып, емен-жарқын әңгімелесіп, шер тарқатты. Ардагер ұстаз Ұлмекен Шанайқызы, білім саласы ардагерлері бас­тауыш ұйымының төрайымы Күлбарам Әбілова сөз сөйлеп, еңбек жолындағы ұстаздық кезеңдерінің қиын­шылықтары мен қызықтарын айтып, бөлісті.

Мерекелік кеш соңында білім бөлімінің басшысы Еркебұлан Жақып пен білім қызметкерлері кәсіподағы комитетінің төрағасы Алмас Есназар ардагер ұстаздарды марапаттап, сый-құрмет көрсетті.