Ұшқыр ой мен алғырлық сыналған сәт

Аудандық қоғамдық даму бөлімінің қолдауымен, «Сырдария-Нұрдария» қоғамдық қорының ұйымдастыруымен «Руханият орталығында» «AntiParaCraft» тақырыбында сыбайлас жемқорлыққа қарсы командалық квест-ойыны өтті. Мектеп оқушылары арасында жүзеге асқан квест-ойынға 7 команда қатысты.

Оқушылардың ой ұшқырлығы мен білім деңгейін саралай­тын квест-ойын 4 кезеңнен тұрды. Алғашқы кезеңде коман­да мүшелері өздерін танысты­рып, сыбайлас жемқорлыққа қарсы мәдениетті қалыптастыру бағытын кеңінен насихаттады. Өз кезегінде Иса Тоқтыбаев атындағы №35 мектеп-лицейдің «Таға тұлға», Әбділда Тәжібаев атындағы №36 мектеп-лицейдің «Жалын», №37 мектеп-лицейдің «Адалдық жастары», №126 орта мектептің «Саналы ұрпақ», Әбірәш Жәмішов атындағы №129 мектеп-лицейдің «Парасыз патриоттар», №147 орта мектептің «Adal bol», Оспан Әбілпаттаев атындағы №210 орта мектептің «Әділ қадам» командасы өзара бақ сынап, жеңіс тұғырынан көрінуге талпынды.

Бұл ретте команда мүшелерінің білімі мен алғырлығына төрелік еткен қазылар алқасының құрамында «AMANAT» партиясы Сырдария аудандық филиалының Атқарушы хатшысы, аудандық мәслихат депутаты Ақтөре Ибрагимұлы, тарихи-өлкетану музейінің меңгерушісі Салтанат Қуандықова, «Тіршілік тынысы» газеті бас редакторының орынба­сары Балтабай Ордабеков болды.

– Сыбайлас жемқорлыққа қарсы қоғамдық мәдениетті қалыптастыру, жемқорлықтың ел дамуына кері әсер ететінін тұрғындар санасына сіңіру, сы­байлас жемқорлыққа қарсы тұру, ел дамуына кері әсер қылатынын насихаттау мақсатында өткізілген квест-ойыны жоғары деңгейде ұйымдастырылды. Еліміздің Конституциясы, атау­лы күндер, терминдер, сыбай­лас жемқорлыққа байланысты алынған сауалға жауап берген оқушылардың біліміне аса мән бердік. Жемқорлық індетіне қарсы күрес жүргізу бағытында «Сырдария-Нұрдария» қоғамдық қоры сан түрлі бағытта іс-шара өткізуге көңіл бөлуде. Бұған дейін суретшілер мен инстаграмға пост жазушылар байқауы болып, жеңімпаздар анықталды, – деді «AMANAT» партиясы Сырдария аудандық филиалының Атқарушы хатшысы Ақтөре Ибрагимұлы.

Квест-ойынының нәтижесінде жеңімпаздар анықталып, оларға қаржылай сыйлықтар мен дипломдар табысталды. І орын­ды №126 орта мектебінің оқушылары иеленсе, ІІ орын­ды И.Тоқтыбаев атындағы №35 мектеп-лицейінің оқушылары жеңіп алды. Ал жүлделі ІІІ орынды О.Әбілпаттаев атындағы №210 орта мектебінің оқушылары иемденді. Қалған топтарға ынталандыру сыйлығы берілді. Әділ қазы мүшелерімен қатар «Сырдария-Нұрдария» қоғамдық қорының төрағасы Марат Омаров, Қызылорда облысының мемлекеттік архиві КММ-ге қарасты Сырдария аудандық архиві филиалының басшысы Жәнібек Сейлов белсенді оқушыларды марапат­тады.

«Тт» ақпарат