Ауыл шаштаразы
Шаштараз қызметі қашанда сұранысқа ие. Әсіресе ауылдық жерде кемінде бір-екі шаштараздың болуы қажет. Ауданның Ақжарма ауылында ерлер шаштаразы қызметін ұсынып отырған үш бірдей шебер бар. Соның бірі – Беркімбай Адамбаев. Өз ісін жетік меңгерген шаштараз бұл кәсіппен айналысқанына біршама жыл болған. Ол 2019 жылы мемлекеттен қайтарымсыз грант алып, кәсібін бастауға мүмкіндік алған. Жеке кәсіпкер ретінде тіркеліп, сол жылдан бастап ауылда «Айкен» ерлер салонының жұмысын жолға қойған.
– Осы ауылда туып-өстім. Екі қолға бір жұмыс табу мақсатымен өзім бала кезімнен қызығушылық танытқан, әрі осы кәсіпті бастауыма жол көрсетіп, ықпал еткен әпкем Айшаның арқасында шаш қиюды үйрендім, кәсіби маман атандым. Жай қызығушылықтан басталған хоббиім, нағыз шебер болуға дейін әкелді. Ізденістің, әрі талабымның арқасында кәсіпкер болдым. Табыс тауып, тұрғындардан сұранысы бар кәсіп түрімен айналысып келемін. Мемлекеттен осыдан алты жыл бұрын қайтарымсыз 250 мың теңге грант ұттым. Бұл қаржыға қажетті құрал-жабдықтар сатып алдым. Жеке ғимараттың ішін ерлер салоны етіп жабдықтадым. Қазір тұрақты келушілерім бар. Күніне бірнеше адамның шашын аламын, – дейді кәсібінен табыс тауып отырған Беркімбай Сағындықұлы.
Шын мәнінде ауыл адамдары қазір шаштараз қызметіне қалаға немесе аудан орталығына сабылмайды. Олар үшін ауыл шаштаразының қызметі жеткілікті. Үлкен қаланың шеберлерінен кем түспейтін шаштараздың жұмысына дән риза. Әсіресе ер балаларының шашын сәнді етіп алғызатын ата-аналардың да қарасы қалың. Қазір жаңа оқу жылы басталар тұста уақытпен санаспай жұмыс істеп тұрған Беркімбайдың шаштаразының жұмысы қызып тұр. Кәсібі арқылы табыс тауып, отбасы бюджетін толықтырып отырған кәсіпкердің еңбегі адал. Негізінен мемлекеттен қолдау болса шеберханасын кеңейтіп, заманауи үлгіде жабдықтауды жөн көретін Беркімбай өзінің қызметін кеңейтуді жоспарлап отыр.
– Әрине, іші-сырты заманауи жабдықталған ерлер салонын жасау, жұмысқа көмекші алу ойда бар. Шаш қиюмен ғана шектелмей, басқа да қызмет түрін қосқым келеді. Ол үшін қаражат керек. Бірнеше шаштараз жабдығын алып, ауыл тұрғындарына қызметімді ұсыну алға қойған мақсатым. Әзірге күнделікті табысым жетеді, – дейді өз ісінің шебері.
Иә, өз ісіңді шынайы сүйіспеншілікпен атқару, сүйікті ісіңмен айналысу адамға шабыт, қуаныш әкелері сөзсіз. Шаштараз қызметін ұсыну арқылы ерекше шабыттанып, күні бойы екі аяқта тұрып шаршағанын ұмытып кететін шаштараздың ынтасы мен жігері мықты. Оның уақытпен санаспай күн ұзақ, демалыс күндері де еңбек ететіні ауылдастарына жасаған қолайлы жағдайы. Күні бойы жұмыста болып, кешқұрым шашын алғызуға келетіндер де Беркімбайдың қызметіне алғыс айтады.
– Ауыл азаматы Беркімбайды жақсы білеміз. Шаштараздыққа бұрыннан құмар-тын. Оның ынтасы мен ықыласына тұрғындар риза. Ауылдың ер азаматтары өзіміздің ауылда шаштараз қызметінің болғанына қуанамыз. Әйтпесе арнайы күн мен уақыт бөліп, шаш алдыруға қалаға баратын едік. Айына кемінде бір рет шаш алдырамыз. Қызметіне көп ақы сұрамайды. Балаларға жеңілдігі бар. Жұмыстың көзін тауып, қолынан келетін істі кәсіпке айналдырып отырған кәсіпкерге алдағы уақытта жұмысының жандана түскенін тілейміз, – дейді ауыл тұрғыны, әрі тұрақты келушісі Сағитжан Сауранбаев.
Ақжармалық және көрші ауылдардан арнайы келетін азаматтарға шаштараз қызметін көрсетіп отырған Беркімбай өз кәсібі арқылы талай жасқа үлгі болып отыр. Ол кәсіпкер ғана емес, үлгілі отбасының отағасы. Жұбайы Венера Ахметова – ауылдағы мектепте мұғалім. Олар 5 бала тәрбиелеп отырған бақытты отбасы. Қарашаңырақтың түтінін түтетіп отырған ерлі-зайыптылар ата-анасының ақ батасымен көгеріп көктеуде, ұрпақ қуанышына кенелуде.
Бибісара ЖАНӘЛІ
