Сыбайлас жемқорлыққа қарсы қоғамдық мәдениетті қалыптастыру мақсатында жүзеге асқан байқауда 15 талапкер бақ сынады. Олардың қатарында аудан мектептерінің оқу­шы­лары мен «Жалын» сауықтыру лагерінің тынығушылары бар. Бай­қау барысында қатысушылар А3 форматтағы қағазға сыбайлас жем­қорлыққа қарсы қоғамдық мәдениетті қалыптастыратын сурет салып, қазы­лар алқасына ұсынды. Талапкерлердің шығармашылық қарым-қабілетіне, өнеріне, сурет салудағы шеберлігіне «AMANAT» партиясы Сырдария аудандық филиалының Атқарушы хатшысы Ақтөре Ибрагимұлы, аудандық мәслихат депутаты Алмас Есназар, «Сырдария – Нұрдария» қоғамдық қорының төрағасы Марат Омаров, «Жалын» сауықтыру лагерінің директоры, суретші Әділбек Бәйменов, аудандық «Тіршілік тынысы» газетінің бас редакторының орынбасары Балтабай Ордабеков баға берді.

– «Жемқорлық – өркениеттің жауы» екені даусыз. Әділетсіз табыс – адал ниеттің түбіне жететіндігін жақсы білеміз. Сыбайлас жемқорлық – қоғамның рухани дағдарысы екенін ұмытпаған абзал. Сингапурдың тұң­ғыш премьер-министрі Ли Куан Ю: – «Сыбайлас жемқорлықпен күрес – науқан емес, тұрақты мінез болуы керек» деген болатын. Қоғам өмірінде жемқорлық фактісін болдырмау үшін жергілікті заң аясында түсін­дірме жұмысын күшейтуіміз керек. Жемқорлықтың салдарын, қоғамның тежелуін байқаудың әрбір қатысушысы қылқаламмен терең­нен жеткізе білген. Өнердің ең көркем бағытын таңдаған кез келген оқушы қоғамның кеселіне қарсы көзқарасын айқын жеткізе білген, – деді Алмас Есназар.

Нәтижесінде ұсынылған суреттің байқау тақырыбына сәйкестігі, тақы­рып­тың толыққанды ашылуы, өзектілігі, тартымдылығы, орындау сапасы мен технологиясы ескеріліп, жеңімпаздар анықталды. Жүлделі І орынмен №36 Әбділда Тәжібаев атындағы мектеп-лицейдің оқушысы Айым Байжанова марапатталса, ІІ орынды Әлсина Әділбекқызы иеленді. Ал №126 мектеп оқушысы Айым Төлетаева жүлделі ІІІ орын иегері атанды. Қалған 12 қатысушыға ынталандыру сыйлығы берілді. Жеңімпаздар мен жүлдегерлерге диплом, алғыс хат және бағалы сыйлық табысталды.

«Сырдария – Нұрдария» қоғамдық қорының төрағасы Марат Омаров сөз сөйлеп, сыбайлас жемқорлыққа қарсы қоғамдық мәдениетті қалыптастыру ортақ міндет екенін айтты. Сурет салуға икемді оқушыларға сәттілік тілеп, тілектестігін білдірді.

– Біз жыл сайын сан түрлі сыбайлас жемқорлықтың алдын алуға қатысты байқау ұйымдастырамыз. Биыл «Жалын» тынығу-сауықтыру лагерінде ұйымдастыру жөнінде бастамамызды қолдаған ұжымға алғыс айтамыз. Оқушылар ой-өрісінің жоғары екенін ерекше байқатты. Өздері салған суреттері арқылы белгілі бір ойды айтқысы келгенін дәлелдеді. Алдағы уақытта қордың тарапынан осындай шығармашылық байқаулар ұйымдастырылып тұрады, – деді Марат Омаров.