«Жалын» лагері – шаттық пен шабыттың мекені
Жаз – оқу аяқталып, оқушылардың көңілі көтеріліп, демалатын, дамитын шағы. Түрлі демалыс орындары ашылып, балалардың жан-жақты қалыптасуы қарқынды жүреді. Сондай демалыс орындарының бірі – «Жалын» сауықтыру лагері.Әр он күн сайын жаңа тынығушыларына есігін айқара ашатын сауықтыру лагері алғашқы тынығушы балаларды шығарып салды. Салтанатты кешті аудандық білім бөлімінің басшысы Еркебұлан Жақып ашып, балаларға ақ тілегін жаудырды. Әрі қарай сөз кезегін аудандық білім бөлімінің кәсіподақ комитетінің төрағасы Алмас Есназар, «AMANAT» партиясы Сырдария аудандық филиалының Атқарушы хатшысы Ақтөре Ибрагимұлы, аудандық қоғамдық кеңестің төрағасы Марат Еспенбетов, ардагер ұстаз Сансызбай Сәдуақасов және қоғамдық кеңес мүшелері жалғап, балаларға ақжарма тілегін білдірді.
Сонымен қатар он күн бойы лагерде ұйымдастырылған іс-шараларға белсенді қатысқан тынығушылар марапатталды. Атап айтқанда, «Үздік суретші» аталымын Арша Бақытжан, «Үздік футболшы» аталымын Мейіржан Тимурұлы, «Үздік қақпашыны» Ернұр Бақытжанұлы, «Үздік бишіні» Жанель Нұрланқызы, «Үздік домбырашы» аталымын Даулетхан Көзейбай, «Үздік актер» аталымын Сырым Сұлтанбек, «Үздік пародистті» Ақдаулет Алмас, «Үздік әзілкешті» Айзере Сағынова, «Үздік волейболшыны» Ботагөз Қорғанбаева, «Үздік сәнқойды» Мадина Нұрлыбекқызы, «Үздік диско-жұлдыз» номинациясын Аделя Темірханова және «Үздік әнші» номинациясын Динар Махмут жеңіп алды. Сондай-ақ, «Лагерь серісі» атағын Қасымжомарт Төлепберген, «Үздік топ басшы» номинациясын Қарақат Уалихан, «Көңілді кейіпкерді» Жұлдызай Ерназарова, «Үздік ұйымдастырушыны» Айдана Айтқожаева, «Сахна шебері» номинациясын Ақниет Сәндібекова, «Үздік гитаристті» Тоқтаржан Кеңесов, «Үздік өнертапқыш» номинациясын Ләйлім Жарылқасын және «Күлкі генераторы» атағымен Нұрасыл Әбіласан марапатталып, сый-сияпат табысталды.
Мерейлі мереке көтеріңкі көңіл-күймен қыза түсті. Балалардың шығармашылық өнерімен жалғасқан салтанатты іс-шара өз мәресіне жетті. «Жалын» сауықтыру лагерінің басшысы Әділбек Бәйменов кешті қорытындылап, барша тынығушыларға алдағы жазғы демалысына сәттілік тіледі.
– Бүгінгі лагердің алғашқы кезеңінің жабылу салтанаты өз деңгейінде өтуде. Ұйымдастырылған түрлі іс-шараларға белсене қатысқан және әр тынығушы балаға шаттық пен шабытқа толы көңіл-күй сыйладық деп ойлаймыз. Алған марапаттарың жетістіктеріңнің бастамасы болсын. Алдағы уақытта сендерді «Жалын» сауықтыру лагері асыға күтеді, – деді демалыс орнының басшысы.
Гүлсезім ЖАНСЕРІКҚЫЗЫ
