Бүгінде 73 жастағы өнер иесінің кеудесінде қажырлы еңбегі үшін «Мәдениет майталманы», «Сырдария ауданының 80 жылдығы» медалі жар­қы­райды. Жергілікті саз­гер­дің атында мерейлі 70 жасында «Ән қанатында» атты байқау ұйымдастырылып, ауданның өнер­­паздары бақ сы­наған.

– Біз Ермекбай ағайдың шә­кір­тіміз деп айта аламыз. Осыдан 28 жыл бұрын оңтай­ландыруға байланыс­ты қос аудан бірік­кен кезде клуб үйлерін қабылдап алу маған жүк­телген болатын. Жас маман ретінде Қо­ға­лыкөл ауылына келгенімде Ермекбай ағамыз күтіп алып, клуб үйі жұмысымен таныстырған еді. Сол күннен бастап талантты сазгермен байланысымыз үзілген емес. Үнемі ақылман ағамыз салалық қызметке байланысты бағыт-бағдарын беріп, барлық жағынан қолдау көрсетіп келді. Материалдық базаның тапшылығына қарамастан, ауыл мәдениетін көтеруге күш салды. Бірнеше жыл бұрын жаңа клуб үйінің ғимараты салынған уақытта басы-қасынан табылды. Ғимараттың сапалы салынуына аса көңіл бөлді. Мәдениет ошағының шегесіне дейін дұрыс қағылуына аса мән беріп, клуб үйін ыждағаттылықпен қабылдап алды, – дейді аудандық мәдениет және тілдерді дамыту бөлімінің бас маманы Жеңісбек Төрәлиев.

Иә, Ермекбай Әдікенов шығар­машылық адамы ретінде үнемі тол­­қыныс үстінде жүреді. Сонау тоқы­рау жылдары аудан мәде­ниетін құл­дыратпай ұстап қалу межесі тұрғаны белгілі. Осындай қилы кезеңде білікті басшы, іскер ұйым­дас­тырушы ретінде талантты сазгерді әріп­тестері тани түсті десек артық айтқандық болмас. Қызметіне адал мәдениет саласының майталманы ауылдан талай мықты өнерпаздың шығуына өзіндік үлесін қосты. Әжелер және Әкелер ансамблін құрып, аудан мерейін республика көлемінде арттырды. 50 жылға жуық мәдениеттің қазанында қайнаған талантты аза­маттың іскерлігі бір төбе.

Бір салада ұзақ жыл қызмет еткен замандастары да Ермекбай аға жайлы «оның жаны жамандыққа қас екенін, мәдениеттің ыстық-суығына көніп, өз саласын жетік меңгергенін» айтады. Сазгерлік өнерімен қатар, өлең жазатын Ермекбай ағаның «Асыл жандар», «Анамды іздеймін», «Ұмытпадым», «Арман гүлім» әндері лирикалық сарында жазылған.

Саланың дамуына атса­лысқан ардақты саз­гер­дің өнердегі әріптесі, аудан­ның Құрметті азаматы Сан­сызбай Сәдуа­қасов та Ермекбай Әді­ке­новпен тығыз байланыс орнатып, абыройлы еңбек еткенін айтады.

– Республикалық, облыстық бай­­­қау­ларда бірге бақ сынап, Сыр топы­рағынан текті, талантты жандар туатынын дәлелдей түстік. Қай кезде де Ермекбай мен жары Баянға құрметім ерекше. Осы күні ауданымыздың дарынды азаматы ақылман ақсақалға айналды. Ел сыйлаған замандасыммен талай қызығы мен шыжығы көп әрбір күнді бірге өткіздік, – дейді өнер жолында бірге жүрген Сансызбай аға.

Өнегелі өмір иесі Ермекбай Әдікенов 1969 жылы Қызылорда қала­­сындағы №69 кәсіптік-тех­ника­лық училищесін бітіріп, «Сыр гүлі» ансамблінің құрамында өнер көр­сет­кен. 1970-1974 жылы Н.Гоголь атындағы Қызылорда мемле­кеттік инс­ти­тутының музыка факультетін бітірген. 1974-1984 жылдар аралы­ғында Қоғалыкөл ауылындағы №44 орта мектептің әуез пәнінің мұғалімі қызметін атқарған. 1987-1997 жылдар аралығында әуез мектебінің директоры болған. 1998-2015 жылдары Қоғалыкөл ауылдық клубының басшысы қызметін үйлестірді. Өнер саласында 47 жыл қызмет етіп, 2015 жылдың қыркүйек айында зейнеткерлікке шықса да ауданда құрылған «Алтын қазына» ансамблінің мүшесі ретінде сахнада өнер көрсетіп жүр.

Жалпы жиырмаға жуық әннің авторы, облыстық К.Дүйсекеев атын­дағы «Туған жер» әуендері атты сазгерлер байқауының жеңімпазы өнер саласынан әлі күнге дейін алыстаған емес.