Тіршілік тынысы Tirshilik-tynysy.kz ақпараттық агенттігі
» » » Мәдениет майталманына құрмет көрсетілді

Мәдениет майталманына құрмет көрсетілді

Өткен аптада аудан әкімі Мұрат Ергешбаев сазгер, мә­де­ниет са­ла­сының ардагері Ермек­бай Әдікенов­ті 70 жылдық ме­рей­тойы ая­сын­да қабылдады. Кез­де­суге аудандық мәдениет және тіл­дерді дамыту бөлімінің басшы­сы Жеңісбек Төрәлиев, «ҚР Мәдениет саласының үздігі», Жан­темір Айсин мен Сансызбай Сәдуа­қасов, Қоға­лыкөл ауылдық клуб үйінің меңгерушісі Динара Иба­дул­лаева, сазгердің жары Баян Биқожаева қа­тысты.

Келелі басқосуда аудан әкімі мерейтой иесін 70 жа­сымен құттықтап, құрмет көр­сетті.

– Өнер саласының қадірлі арда­гері ретінде Сізді айрықша құрмет тұ­та­мыз. Мерейге толы ерекше күні мәдениет пен өнер саласына ең­бегі сіңген аға буын өкіліне айтар ал­ғы­сымыз шексіз. Еліміздің өркен­деп-өсуіне, мәдениет биігіне шығар­машылық тұрғыдан қызмет етіп, көп­ке үлгі бола білдіңіз. Қиын-қыстау күн­дері аудан мәдениетін дамытуға зор үлес қостыңыз. Мәдениет саласын­да елеулі қызмет етіп, биік белесті ба­ғын­дырдыңыз. Сіздің қаламыңыздан туған әрбір ән тыңдарман жүрегіне жол тапты. Сазгер ретінде сан түр­лі тақырыпта ән жаздыңыз. Осынау мерейлі мерей­тойыңызда деніңізге саулық, отбасы­ңызға амандық тілеймін, – деді аудан басшысы.

Өз кезегінде аудан басшысы ме­рейлі 70 жасқа толған Е.Әдікеновтің иығына шапан жапты. Мәдениет саласында атқарған қажырлы еңбегі үшін «Мәдениет майталманы» медалін кеу­десіне тақты. Сондай-ақ сазгердің асыл жары Баян Биқожаеваға да құр­мет көр­сетті.

Кездесу барысында талай жыл мә­дениет саласын өркендетуге үлес қос­қан сала майталмандары, әріптестері Ермекбай Әдікеновке жылы лебіздерін жеткізді. Өткен ғасырдан бері келе жатқан замандастары ауыртпалығы мол қыз­мет­те қажырлы қайрат та­нытқан қоғалыкөлдік саз­гердің еңбегі жайлы пікір біл­дірді. Жиналған көп­­шілік Ермекбай Әдікеновтің 70 жылдық мерейтойы­на арналған «Ән қанатында» атты аудандық бай­қа­уы­ның қатысушыла­ры­на сәтті­лік тіле­ді.

Аудан әкімі Мұрат Ергешбаевтың қа­былдауынан кейін Қоғалыкөл ауы­лында тағылымы мол іс-шараның куә­гері атандық. Жергілікті сазгер, мәдениет саласының ардагері, «Сырдария ауданының 80 жылдығы» меда­лінің иегері Ермекбай Әдікеновтің 70 жылдық мерейтойы аясында Қо­ғалыкөл ауылдық клуб үйінде ау­дан­дық деңгейдегі «Ән қанатында» атты байқау ұйым­дастырылды.

Байқаудың шымылдығын ашқан ау­дандық мә­дениет және тілдерді дамы­ту бөлімінің басшысы Жеңісбек Төрәлиев сазгерді мерейлі жасымен барша ұжымдастары атынан құттық­тады.

– Біз Ермекбай ағайдың шәкіртіміз деп айта аламыз. Осыдан 25 жыл бұрын оңтайландыруға байланысты қос аудан біріккен кезде клуб үй­ле­рін қабылдап алу маған жүктелген болатын. Жас маман ретінде Қоғалыкөл ауылына келге­німде Ермекбай ағамыз күтіп алып, клуб үйі жұмысымен таныстырған еді. Сол күннен бастап талантты сазгермен байланысымыз үзілген емес. Үнемі ақылман ағамыз салалық қызметке байланысты бағыт-бағдарын беріп, барлық жағынан қолдау көрсетіп келеді. Материалдық базаның тапшылығына қарамастан, ауыл мәдениетін кө­теруге күш салды. Бірнеше жыл бұрын жаңа клуб үйінің ғимараты салынған уақытта басы-қасынан табылды. Ғимараттың сапалы салынуына аса көңіл бөлді. Мәдениет ошағының шегесіне дейін дұрыс қағылуына аса мән беріп, клуб үйін ыждағаттылықпен қабылдап алды. Жиырмаға жуық әннің авторының еңбегіне тәнтіміз, – деді бөлім басшысы.

Негізінен, аудандық «Ән қанатында» бай­қауында 9 талапкер бақ сынады. Бірінші кезеңде әрбір қатысушы сазгердің авторлық туын­дысын орындады. Ал екінші кезеңде еркін тақырыпта ән шырқады.

Байқау барысында әділқазы алқасының мүшесі Жантемір Айсин сөз алып, өз замандасына ақжарма тілегін жеткізді.

– Жетпістің желкенін керген замандасым Ермекбай Әдікенов жайлы көп нәрсе айтуға болады. Шығармашылық адамы үнемі толқыныс үстінде жүреді. Сонау тоқырау жылдары аудан мәдениетін құлдыратпай ұстап қалу межесі тұрды. Осындай қилы кезеңде білікті басшы, іскер ұйымдастырушы ретінде талантты сазгерді тани түстік. Қызметіне адал мәдениет саласының майталманы ауылдан талай мықты өнерпаздың шығуына өзіндік үлесін қосты. Әжелер және әкелер ансамбілін құрып, аудан мерейін рес­публика көлемінде танытты. 50 жылға жуық мәдениеттің қазанында бірге қайнаған әріптесіме ұзақ ғұмыр тілеймін, – деді Жантемір Айсин.

Өз кезегінде Қоғалыкөл ауылдық округінің әкімі Б.Рақымбеков, «Қоғалыкөл» ЖШС-нің басшысы Ғ.Теңізбайұлы талантты сазгерді ауыл­­дастары атынан марапаттады. Сонымен бірге осыдан 50 жыл бұрын бірге оқыған курстас­тары арнайы келіп, туған күн иесіне зор ілтипат көрсетті. Сазгердің өмір жолына арналған бейнекөрініс көпшілікке ұсынылды.

Мәдениет саласының ардагері Қабдеш Шағырұлы қатысушылардың өнерін жоға­ры бағалады.

– Сырдария ауданы үлгілі үрдісті жыл сайын жалғастырып келеді. Бірер ай бұрын Аманкелді ауылында сазгер Майрамбай Бектасовтың шығар­ма­шылық ке­шін өткізген болатын. Бүгін міне Ермекбай Әдікеновтің құрметіне жиналып отырмыз. Жаны жамандыққа қас Ермекбай замандысым мәдениеттің ыстық-суығына көніп, өз саласын жетік меңгерді. Сазгерлік өнерімен қатар, өлең жазуды қолға алды. Оның «Асыл жандар», «Анамды іздеймін», «Ұмытпадым», «Арман гүлім» ән­дері лирикалық сарында жа­зылған. Жанынан асыл жары – Баян табылып, саналы ұрпақ тәрбиеледі. Бүгінгі ардақты досымыздың мерейтойына арналған байқау өз деңгейінде өткізілуде, – деген Қабдеш Шағыров авторлық «Құлболды ишан» кітабын жиналған меймандарға сый ретінде тапсырды.

Аудандық байқау қорытындысында бас жүл­дені қоғалыкөлдік Сымбат Мұқанова, І орынды бесарықтық Мөлдір Жүнісбаева, ІІ орынды қалжанахундық Гүлжанат Сырғабаева, ІІІ орын­ды шағандық Гүлзира Раймбекова, арнайы жүлдені асқарлық Әсел Ибраева иеленді. Сондай-ақ аманкелділік Жомарт Ахметов, жетікөлдік Құндыз Бажиева, шіркейлілік Ақзираш Сүйлейменова, қоғалыкөлдік Қайрат Сәтпаев белсене қатысқаны үшін марапат төрінен көрінді.

– Біз Ерекеңмен мәдениет саласында ты­ғыз байланыс орнатып, абыройлы еңбек еттік. Республикалық, облыстық байқауларда бірге бақ сынап, Сыр топырығынан текті, талантты жандар туатынын дәлелдей түстік. Қай кезде де, Ермекбай мен Баянға құрметім ерекше. Осы күні ауданымыздың дарынды азаматы ақылман ақсақалға айналды. Ел сыйлаған замандасыммен талай қызығы мен шыжығы көп әрбір күнді бірге өткіздік. Аудандық байқауда мазмұны терең әндер шырқалды. Барлық қатысушы әнді жүрекпен сезініп, кәсіби тұрғыдан айтуға тырыс­ты. Алдағы уақытта ерекше дауысымен танылған өнер­паздарға сәттілік тілеймін, – деді қазылар алқасының төрағасы Сансызбай Сәдуақасов.

Айта кетейік, Ермекбай Әдікенов 1969 жы­лы Қызылорда қаласындағы №69 кәсіптік тех­­­никалық училищесін бітіріп, «Сыр гүлі» ансамбілінің құрамында өнер көрсеткен. Ал 1970-1974 жылы Н.В.Гоголь атындағы Қызылорда мемлекеттік институтының музыка факультетін бітірген. 1974-1984 жылдар аралығында Қоғалы­көл ауылындағы №44 орта мектептің әуез пәні­нің мұғалімі қызметін атқарған. 1987-1997 жылдар аралығында әуез мектебінің директоры болған. 1998-2015 жылдары Қоғалыкөл ауылдық клубының басшысы қызметін үйлестірді. Облыс­тық К.Дүйсекеев атындағы «Туған жер» әуендері атты сазгерлер байқауының жеңімпазы. Өнер саласында 47 жыл қызмет етіп, 2015 жылдың қыркүйек айында зейнеткерлікке шықты. Жолдасы Баян апаймен бірге 5 бала тәрбиелеп, 11 немере сүйіп отыр.

Аудандық байқау соңында Ермекбай Әдікенов жиналған қауымға өз ризашылығын білдірді. Бұл ретте, жергілікті ақын Байрон Есенбайдың сазгерге жүрекжарды арнауы жұртшылық көңілінен шықты.

Балтабай ОРДАБЕКОВ
27 қыркүйек 2022 ж. 386 0