Әкесі Жолдасбек пен анасы Сәрсенкүлдің өмір­ге әкелген бес пер­зентінің үшіншісі болып бой­жеткен Зина Кенжебекова аудан орта­лы­ғындағы №210 О.Әбіл­пат­таев атын­дағы мек­тептің түлегі. Сол кездегі се­гіз­­жыл­­дық мек­тепті бі­тірген соң Қызылорда қа­ла­сындағы ме­ди­циналық учи­лищеге оқу­ға түсуді ар­ман­даған бо­лашақ медбике оқу­ға түсіп, қолына дипломын алады. Оқуды жақсы аяқтаған маман аудандық ауруханаға жұмысқа қабылданады. Бұл өткен ғасырдың 1984 жылы енді. Өзі секілді меди­циналық училищені бітіріп келген оншақты медбике алдымен білік­тілікті арттыру курсына оқуға барады. Қабілеті мол, зерек маман курсты тәмамдап, ең алғашқы еңбек жолын аурухананың терапия бөлімшесінде бастайды. Осы бөлімшенің ем-шара бөлмесінде 25 жыл бойы медбике болып, еңбегінің арқасында абыройға бөленеді.

– Жауапкершілігі мол жұмыста ең алдымен медбикеге қажетті талап ыж­дағаттылық пен ептілік. Дәрігердің тағайындаған емін ұқыпты орындау, дертіне шипа іздеген науқасқа үміт отын береді. Медбикенің мейірімді қарым-қатынасы мен аялы алақаны, жылы сөзі жаны жабырқаған адамға бірден бір ем болады. Осыған менің ұзақ жылғы еңбегімнің арқасында көзім жетті. Аға ұрпақтан тәрбие көрген біздер Қадиша Орынбаева, Майра Бақтыбаева секілді апайлардан көп нәрсе үйрендік. Сол үшін бұл кісілерге алғысымыз мол. Апайлар өмірлік тәжірибелерін үйретуден жалықпады, біз де өз кезегімізде кейінгі жас мамандарға білгенімізді әлі күнге дейін үйретіп келеміз, – дейді жоғарғы санатты аға медбике Зина Жолдасбекқызы.

Өзінен кейінгі ізін басып келе жатқан әріптестері, бүгінде басқа бөлімшеде қызмет атқаратын Жанат Жұмаділ, Сәуле Арғынбаева соңғы 17 жылдан бері бөлімшенің аға медбикесі қызметін атқарып келе жат­қан әріптесі жайлы жылы лебізде. «Зинаның бойында жұмысына деген тиянақтылық, жауапкершілігі өте жоғары, білгенін үйретуден жалық­қан емес», деген сөздері шағын ұжымның ауызбіршілігін көрсетсе керек.

Қазіргі кезде денсаулық сақтау саласында жаңалық пен өзгеріс өте көп. Үнемі біліктілікті арттыру, мед­бикелерді аттестациядан өткізу, сапалы кадрлармен қамту бүгінгі күннің талабы. Әсіресе науқасты емдеу әдісіндегі өзгеріс, яғни нақты диагноздың өз емдеу хаттамасы болатынын түсін­діру кейде оңайға соқпайды. Көңілі жарымжан, дертіне дауа іздеген нау­қас­қа бұл жа­йында дұрыс түсін­­дірудің өзі кейде мүмкін бол­­майды. Осындайда білікті ма­манға көп жыл­ғы тә­­жірибесі кө­мек­­теседі. Яғни, сала­матты өмір салтын ұстану ар­қылы, дұрыс тамақ­тану кез кел­ген аурудың алдын алады. «Ауы­рып ем іздегенше, ауырмаудың жолын ізде» деген қағида Зина Жолдасбекқызы­ның ұстанымына айналған.

– Күні бойы екі аяқта жүретін медбикелердің жұмысы оңай емес. Осы ретте бөлімшенің мең­геру­шісі, білікті дәрігер Айгүл Жакупованың еңбегін атап өткім келеді. Әріптестерінің ғана емес ем­делуші­лердің алғысына бөленген ақ халатты абзал жанның кәсіби біліктілігі мен адамгершілік қасиеті ерекше. Дәрігер күнделікті қызметін таңертеңнен бастап, науқастың жағ­дайын жіті бақылап, сауығып кетуіне барын салады. Ал бөлімшедегі күн тәр­тібі әріптестерімізбен бірге дене жаттығудан бастау алуы күнделікті дағдымызға айналды. Бұл өз кезе­гінде күні бойы сергек жүруге көмектеседі, – дейді өз сөзінде аға медбике.

Аурухананың «Терапия» бөлім­шесінде қызмет атқаратын аға медбике аурухананың қоғамдық жұмысына да белсене араласады. Мереке күндерін ұйымдастыру, әріптестерімен бірге спорттық іс-шара­ларға қатысуға да уақыт табады. Ұзақ жылғы қызметінде алғысқа кенелген ақ халатты абзал жанның марапаттары бір төбе. Олардың әрқайсысы адал еңбегіне берілген лайықты баға. Әсіресе соңғы жылдары кеудесіне тағылған «Сырдария аудананың 90 жылдық медалі» мен өзі білім алған Қызылорда меди­циналық колледжінің 80 жыл­дық медалі медбикенің мерей мәртебесін одан сайын өсірді.

Бүгінде адал еңбектің маңдай термен келетінін бойына сіңірген медбике қызы Әселге сүйікті ана. Әсел осы күні мұғалімдік мамандығын алып, елге қызметін бастаған жас маман.

Медбикелердің халықаралық кү­нінде дәрігердің сенімді серігі бола білген мінсіз қызмет иесіне ұзақ өмір, қажымас қайрат тілейміз.