Денсаулығы сыр берген тереңөзектік Күлсара Сапарова сала маманына буын­дары сырқырап, мазалап тұрғанын айтады. Арнайы ережеге сай Дәуіржан Мәжит науқасқа ем-шара қолданады. Ине шаншып, денсаулығының жақсаруын бақы­лайды. Қырағы маман бір мезетте үйден жағымсыз иіс шыққанын байқайды. Қапелімде ас бөлмесінен табиғи газдың шығып жатқанын аңғарған фельдшер сақ­тық іс-шарасын жасауға көшеді. Есік-терезені ашып, үйдегі отбасы мүшелеріне медициналық көмек көрсетеді. Заматында бөлмеге тараған улы газдың адам өміріне қауіптілігі жоғары болатын. Адамдардың улануы­на тосқауыл қойған фельдшер бар мақтауға лайық. Гиппократ антына адал бо­ла білген кәсіби маман өз ісіне адалдық таныта білгені рас.

– Жаңа жыл күні мерекесінде көмек сұраған барлық адамға көмек қолын создық. Шын мәнінде, кәсіби тұрғыдан медициналық көмек көрсету – әрбір маманның міндеті. Күлсара апаға тиісті ем-шара қолданғаннан кейін «Жедел жәрдем» автокөлігінің жүргізушісі Нұрбол Обашқановпен «Қабылдау» бөлімшесіне апар­дық. Дәрігер бақылауына алып, нау­қастың денсаулығын қатаң қадағалауға алды. Әрине, үйге барған кезімізде алғаш­қыда «көгілдір отынның» иісі сезілмеді. Кез келген адам жасауға тиісті іс-әрекетке бардым, – дейді Дәуіржан Сәбитұлы.

Дәуіржан Сәбитұлы Сырдария аудан­дық ауруханасында 5 жылдан бері қызмет етіп келеді. Алғаш «Жастар тәжірибесі» арқылы жұмысқа орналасқан сала маманы кейіннен ота бөліміне ауысады. Аз ғана уақыттың ішінде мол тәжірибе жинақтаған ол – №131 Талғат Қозыбаев атындағы орта мектептің түлегі.

– Дәуіржан балама шынайы алғысымды айтамын. Біз отбасымызбен қиын жағ­дайға тап болғанымызда көмек қолын созғанына дән ризамыз. Бір үйлі жанды аман алып қалды десем, болады. Жаны жақсылыққа жақын баламның еңбегін ерекше бағалаймын. Мүмкін мен «Жедел жәрдем» шақырмасам, үйімізде қайғылы жағдай орын алатын еді, – дейді Күлсара Сапарова.