Өнерімен өрге жүзген ауыл
![](/uploads/posts/2024-07/medium/1721717809_a81dfa24-1f01-4311-b48b-11862fdfa380.jpeg)
«Өнер тұнған – туған жер» тақырыбындағы фестивалдің ашылу салтанатында аудандық мәдениет және тілдерді дамыту бөлімінің басшысы Анар Қалдыбаева сөз сөйлеп, өнерпаздарға сәттілік тіледі.
– Сырдария ауданында ауқымды жоба қолға алынғаны мәлім. Біз ілкімді істерге иек артып, барлық мәдениет ошағында өнердің кез келген жанры қамтылған фестиваль барысына толықтай қанығып келеміз. Әрине, ортақ тәжірибе алмасқан кәсіпорын басшылары салаға серпіліс сыйлауда. Өз кезегінде өзара жарыса жүріп, шығармашылық әлеуетін байқата білген ұжымдар арасынан «Үздік мәдениет үйі – 2024» және «Үздік кітапханашы – 2024» номинациясы бойынша жеңімпазды анықтаймыз. Барлық талапқа сай келген мәдениет ошағы комиссияның шешімімен үздік атанады. Осы орайда, Асқар Тоқмағамбетов ауылының халқы өнерде кеңде емес екендігін жан-жақты байқата білді, – деді Анар Сраждинқызы.
Асқар ақынның ауылындағы кеште көпшілік «Адал адам» мәдени-тәрбие тұжырымдамасы негізінде қолға алынған әрбір жобаға жоғары баға берді. Сонымен қатар ауыл өнерпаздары киелі сахнада сан түрлі жанр бойынша өз өнерлерін жиналған көрермендерге көрсетті. Ән айтылып, би биленді. Қағытпа қалжыңға негізделген сахналық қойылым әрбір адамның жүрегінен жол тапты. Көркем сөз шеберлі Асқар Тоқмағамтовтің бірнеше шығармасын орындаса, ақ жаулықты аналар халық әндерін шырқады. Осыған дейін іргелі ауыл жөнінде жарық көрген кітап таныстырылып, тарих қойнауынан сыр шертетін құнды мұралар көрсетілді. Ал қолөнер шебері, өлкетанушы Жәнібек Маханбет пен ісмер, жеке кәсіпкер Нұрсұлу Ажарова өз туындысын келген қонақтарға ұсынды.
Балтабай ОРДАБЕКОВ