Кеңейтілген мәжілісте білім саласының жай-күйі талқыланды

Кеше аудан әкімі Берік Сәрменбаевтың төрағалығымен білім беру ұйымдарының жай-күйі туралы кеңейтілген мәжіліс өтті. Мәжілісте балалардың заманға сай озық білім алуы, білім мекемелерін қауіпсіз орынға айналдыру, оқушыларға өнегелі тәрбие беру және тағы басқа өзекті мәселелер жан-жақты талқыланды.

Мемлекет Басшысы Түркістан қаласында өткен «Әділетті Қазақстан – Адал азамат» атты екінші Ұлттық құрылтайда «Мектеп – білімнің ғана емес, тәлім-тәрбиенің де ордасы. Баланың бойына біліммен қатар адамгершілік құндылықтарын сіңіру – ұстаздардың міндеті» деген болатын. Сондықтан біз балалардың тәрбиесіне аса жауапкершілікпен қарауымыз керек. Бұл ретте, ұстаздарға екі есе жүк артылады. Бүгінгі күні педагог – ұлттың жаңа сапасын қалыптастыру үдерісінде маңызды рөл атқарады. Аудан ұстаздары осы талап үдесінен шығуы тиіс, – деді Берік Әбдіғаппарұлы.

Мәжілісте 2023 жылдың қараша, желтоқсан айларында білім саласында заңдылықтардың сақталуы және құқық бұзушылықтың профилактикасы бойынша жүргізілген тексерулер нәтижесін аудан прокурорының орынбасары Ғ.Дүйсенбаев мәлімдеді.

Аудан басшысы білім ошақтарында анықталған кемшіліктерді шұғыл түрде қалпына келтіруді тапсырды.

Мұнан соң балалар мен жасөспірімдер арасындағы қылмыс пен құқық бұзушылықтың алдын алу бағытындағы шаралар туралы аудандық полиция бөлімі бастығының міндетін атқарушы Ә.Қанзадаев хабарлама жасады. Есепті мерзімде 214 әкімшілік құқық бұзушылық анықталып, оның ішінде, түнгі уақытта заңды өкілсіз ойын-сауық және тұрғын жайдан тыс жүрген 185 жасөспірімнің ата-анасы әкімшілік жауапкершілікке тартылған. Сонымен қатар, балаларды тәрбиелеу және білім беру жөніндегі міндеттерін орындамаған 18 ата-анаға әкімшілік хаттама рәсімделген.

Аудан әкімі аймақ басшысының тапсырмасымен елді мекендерде учаскелік полициялардың тұрақты тұруын, қоғамдық тәртіпті қамтамасыз етуді қатаң бақылауда ұстауды жүктеді.

Кеңейтілген мәжілісте аудандық білім бөлімінің басшысы Б.Жәнібеков атқарылып жатқан жұмыстарға тоқталды. Аудан бойынша 17 орта білім беретін мектептерде 8193 оқушы білім алуда. Өткен оқу жылының қорытындысымен жалпы орта білім беретін мектептердің рейтингісі жасалып, жоғары, орта және төмен деңгей сарапталған. Соған орай, нәтиже көрсетпеген мектеп басшыларының тиімділігіне бағалау жұмыстары жүргізілмек. Биыл ауданда 434 оқушы мектеп бітіреді. Қаңтар айында басталған ҰБТ-ға 404 түлек қатысуда.

Мәжілісте аудан басшысы білім сапасын арттыру, балаларға саналы тәрбие беру бағытында жұмысты күшейту керектігін айтты. Білім сапасы төмен мектеп басшыларының мәселесін қарап, ұстаздардың жауапкершілігін арттыруды, жасөспірімдер арасында құқық бұзушылықты болдырмау үшін тәрбиелік мақсатта кешенді іс-шаралар жоспарын әзірлеп, жүйелі жұмыстар жүргізуді тапсырды. Сондай-ақ, аудан ұстаздары арасында «Педагог шебер» біліктілік санаты мүлде жоқ екенін айтып, тиісті жұмыстарды атқаруды назарға салды.

Кеңейтілген мәжілісте сала жұмысын жетілдіруге байланысты ұсыныс-пікірлер айтылды. Аудан әкімі тиісті сала басшыларына тапсырмалар берді.