Сауда нысанындағы жағдай тұрақталды
25 қаңтар күні Қызылорда қаласындағы «Қорқыт» сауда орталығында аяқ киім тауарына жаппай жеңілдік ұйымдастырылған. Алайда, акция барысында келеңсіз жағдай орын алып, халық наразылығы туындады. Осыған байланысты жеке кәсіпкерге ескерту беріліп, сауда нысанындағы жағдайды тұрақтандыру үшін қажетті шаралар қолға алынды. Бұл туралы Өңірлік коммуникациялар қызметінде өткен брифингте облыстық кәсіпкерлік және өнеркәсіп басқармасының басшысы Дінмұхамед Әбсаттаров ақпарат берді.– Акцияны ұйымдастырушы «BiAi» спорттық аяқ киімдер дүкені 23 қаңтар күні әлеуметтік желілерде барлық аяқ киімдер 1000 теңгеден жаппай сатылымға шығарылады деген хабарлама таратқан. Жеңілдік ұйымдастырылған күні халық шектен тыс көп жиналуына байланысты келеңсіз жағдай орын алып, дүкенді сағат 10:30-да жабуға мәжбүр болған. Осы жағдайға байланысты кәсіпкер халық алдында кешірім сұрады. Бұл жағдай халық арасында дүрбелең туындатқаннан кейін кәсіпкер аяқ киімдерді мұқтаж адамдарға таратып, қарттар үйіне берді. Сондай-ақ, жеке кәсіпкерге ескерту түрінде шара қолданылды. Қазіргі таңда «Қорқыт» сауда үйінде жағдай тұрақталды. Жаппай сатылым барысында адам қауіпсіздігін сақтау керектігі туралы сауда нысандарында түсіндірме жұмыстары жүргізілуде. Алдағы уақытта осындай акция ұйымдастыру барысында қоғамдық тәртіпті сақтау және халық арасында дүрбелең туғызбау үшін жергілікті атқарушы органдармен және құқық қорғау саласының өкілдерімен келісіп өткізуге шақырамыз, - деді Д.Әбсаттаров
Қызылорда облысының Өңірлік коммуникациялар қызметі
