Алғашқы сессиядағы алаңдау
![](/uploads/posts/2023-08/medium/1693028040_18653ca7337744b8a7bc8ec099ec1fa8.jpeg)
...Мектептен кейін колледжге оқуға тапсырдық. Бала күнгі арманым әрі отбасындағы ата-анамның, әпкелерімнің берген бағыт-бағдары бойынша мұғалім болғым келді. Сөйтіп, М.Мәметова атындағы Қызылорда гуманитарлық жоғары колледжінің студенті атандым. Студенттік өмір. Бейтаныс орта. Жаңа достар. Бәрі біз секілді ауылдан барған, енді ғана үлкен өмірге қадам басқан жас үшін қызық әрі ерекше еді. Әне-міне дегенше алғашқы сессия да келіп жетті. Сессияға тыңғылықты дайындалып жүрген едім. Бір күні бізбен бір топта оқитын құрбым дайындықсыз-ақ сессиядан өтуге болатынын айтып, менің көп уақытымды кітапханада өткізіп жүргенімді бекерге балады.
– Біз жаспыз, жастық шақты тек оқуға арнау дұрыс емес. Сен бекерге оқып жүрсің. Одан да аз-маз ақша беріп, сессияны сатып ала салмайсың ба...
– Сен не деп тұрсың? Сатып алғаны несі?, – дедім құрбыма тесіле қарап.
–Иә, сатып алуға болады. Мен сатып аламын, – деді ерке өскен ол.
Денем дірілдеп, тұла бойым мұздап кетті. Іштей оқытушылар сатылса, біз сатып алсақ, онда не болғаны деп ойлап, құрбыма сессиядан өз біліміммен-ақ өтемін дедім. Құрбым екеуміздің әңгімеміз осымен аяқталды.
Арадан бірер апта өтті. Сессия өтетін уақыт та келіп жетті. Мен кітапханаға кітаптарымды өткізіп, қалай да өз біліміммен ата-анамның сенімін ақтауым керек деп үлкен тебіреніс үстінде жүрдім. Ал, әлгі құрбым болса, сессияға еш дайындалмады. Сабақтан келген соң ұйықтайды. Кешке серуендейді. Жатақханадағы бос уақытын оқуға емес, телефонға телміруге арнайды. Мен мұның бәрінің сұрауы болатынын, әр ісіміздің нәтижесін өзіміз көріп, өзіміз жемісін жейтінімізді түсінетінмін...
Сессия күні біз үлкен аудиторияға кіріп, ауызша да, жазбаша да тест тапсырып, сұрақтарға жауап бердік. Оқытушылар бәрін әділ бағалады. Оның үстіне біздің оқу орнымыз жаңа заман талабына сай жабдықталған. Оқу сапасы өте жоғары. Барлық оқу бөлмелері бейнебақылау камераларымен жабдықталған. Еңбек еш кетпеді. Мен жақсы тапсырып, өзім оқыған, дайындалған тақырыптарда сұрақтарға жауап беріп, сессиядан өттім. Үйдегі ата-анам да менің өз біліміммен, ешкімге салмақ салмай сенімді ақтағаныма қуанып жүр. Енді құрбымның жағдайын баяндайын.
«Сен бекерге оқып жүрсің. Одан да аз-маз ақша беріп, сессияны сатып ала салмайсың ба...» деген құрбым сессия күні қатты қиналды. Ол «Мен сатып аламын» деп бекер айтқанын сол кезде түсінді. Өйткені, ол сессияны сатып алып, ауырдың үстімен, жеңілдің астымен жүргісі келсе де біздің колледжде жемқорлыққа жол жоқ. Білімді, білікті, ең бастысы адал да әділетті оқытушылар студенттердің біліміне қарап бағалайды. Сессия қорытындысы шығып, құрбымның өте алмай қалғанын, өте төмен баға алғанын естігенде оны әрі аядым, әрі жаным ашыды. Жұбатуға сөз таппай, сол күні менің тілімді алып, менімен бірге кітапханаға барып, сессияға дайындалғанда бұлай болмайтынын айтқым келгеніммен көңіліне қарап айта алмадым. Үнсіздікті құрбымның өзі бұзып, маған қарап:
– Сен дұрыс айтыпсың. Мен де сен сияқты сессияға дайындалуым керек еді, – деді.
– Иә, қазір тек біліміне сенетін заман, – дедім құрбымның сөзін қуаттап.
– Мен қателесіппін. Дұрыс ойламаппын. Енді келесі сессияға дайындаламын. Жемқорлық туралы ойды да, ниетті де санамнан шығарып тастаймын, – деді құрбым көзіне жас алып.
Бұл сөздерді естігенде менің денем тағы да дірілдеп, тұла бойым мұздап кетті. Бір жағынан құрбымның ойы мен көзқарасы өзгергеніне қуандым. Иә, жемқорлықтан тыйылуға, сыбайластықтан аулақ жүруге ешқашан кеш емес. Өйткені, сыбайлас жемқорлық – қоғам дерті, соңы өзекті өртер өкінішпен, қылмыспен аяқталатын арам іс.
Осы оқиғадан кейін құрбым екеуміз жақсы араласып, ол да, мен де сабағымызды жақсы оқып жүрміз. Болашақта мектепте ұстаз болып, тәртіпті, тәрбиелі, әділ, адал шәкірт тәрбиелеу – басты арманымыз. Біз Тәуелсіз Қазақстанның дамуына өз білімімізбен үлес қосқымыз келеді. Әділетті Қазақстан құру бастамасын ұсынған Президенттің саясатын қолдаймыз және адал, әділ болып, жемқорлыққа қарсы тұрамыз.
Жоғарыдағы оқиғаны баяндау арқылы жастарға ой салғым келді және тұла бойды мұздататын өмірден алынған шытырман оқиғаны бастан өткерген жас студент ретінде барлық жастарға сыбайлас жемқорлыққа қарсы өзімнің үндеуімді де жарияласам деймін.
Құрметті жастар!
Тәуелсіз Қазақстан – біздің ортақ Отанымыз. Адамда екі Отан болмайды. Тәңір нәсіп еткен жалғыз Отанымызға адал болсақ, онда отбасымызға, ата-анамызға, ұстаздарымызға адал болғанымыз. Сондықтан Отанның болашағы өз қолымызда деп сезініп, әр істе адал, әділ болуға тырысайық. Ешқашан сыбайлас жемқорлыққа бой алдырып, арам іс жасамаңыздар. Оның соңы – өкініш, ұят. Одан да білім алып, Абай атамыз айтпақшы, өзімізге, еңбегімізге сенейік. Менің үндеуімді оқыған әрбір жас, менің жас замандастарым жемқорлыққа қарсы тұрады деп сенемін!».
Басымнан өткерген оқиғаны, үндеуімді қорытындылай келе байқауды ұйымдастырып жатқан азаматтарға алғыс айтып, жұмыстарына сәттілік тілеймін.
Ақжүніс ӨТЕПБЕРГЕН,
№36 Ә.Тәжібаев атындағы
мектеп-лицейінің түлегі,
М.Мәметова атындағы
Қызылорда гуманитарлық
жоғары колледжінің студенті