Құшағың қандай кең еді, Ару-Астана!

Биылғы еңбек дема­лы­сымның соңғы күндерін елордамыз Астана қала­сында өткізу бұйырды. Бұ­^­­ған себеп денсаулықтың жағ­­дайы. Отбасымызбен жүйіт­кіген пойызға отырып, Сарыарқаның сайын даласымен 32 сағатты артқа тас­тап Ару-Астанаға да ке­ліп жеттік. Шіліңгір шіл­денің соңғы күнінде Аста­наның таза ауасымен тыныстап, Қызылорданың ап­тап ыстығынан соң мұн­дағы ыстықты да елемес­тен діттеген жерімізге аман есен жеткенімізге қуандық.

Негізгі мақсат осыдан тоғыз жыл бұрын Елордада жүрекке жасалған отадан кейінгі жағдайымды біліп, дәрігердің қабылдауында болып, кеңес алу болған­дықтан, уақыт оздырмай Ұлттық кардиохирургия орталығына асықтық. Жанымда қамқор жандар отағасы мен әпкем бар. Алыстан еңсесі биік ғимарат кардио­­хирургия орталығын көргенде еріксіз өткен күндер еске оралды.

37 жасымда сыр берген жүрек қақпақ­шаларын ауыстыруға тура келді. Ол үшін еліміздің Елордасы Астана қала­сындағы ең мықты деген дәрігерлерге квота арқылы келген болатынмын. Атақты дәрігер Юрий Пя басқаратын орталық дәрігерлері жан жақты тексеру кезінде нақты диагноз қойып, жүректің екі бірдей қақпашасын механикалық қақпашаға ауыс­­­­­тыру қажеттігін түсіндірген болатын. Ота сәтті өтетініне және отадан соң қалыпты өмірге оралуға болатынын айтқанымен, қан айналымын деңгейінде ұстау үшін өмір бойы дәрі-дәрмек қабылдайтынымды ескертті. Шын мәнінде сәтті өткен отадан кейін араға бірнеше ай салып, қалыпты өмірге қайта орала бастадым. Уақыт нет­кен жүйрік? Қазір арада тоғыз жыл өтіп кеткенін де байқамай қалыппын. Дегенмен соңғы кезде денсаулығыма байланысты шағым көбейген соң, отбасымызбен маған екінші өмір сыйлаған Ұлттық кардиохирургия орталығына барып, қаралуды, кеңес алуды жөн санадық.

Міне, араға жылдар салып мен үшін ерекше орталыққа келіп тұрмыз. Кіре берістегі кең фойеде дәрігерді күтіп отырмыз. Сол баяғы тыныштық пен әсем әуен құлаққа жағымды әсер етеді. Тек бұл жолы әуенді шет жақта тұрған аппақ пианинода музыкант орындап отыр. Жан жағымыздағы адамдармен де әңгімелесіп үлгердік. Көпшілік отырған фойеге бір кезде орталықтың басшысы шығып келді. Оны бірі таныса, бірі танымайды. Дегенмен өзіме жақын, әрі өмірімді сақтап қалуға септігін тигізген дәрігерді көргенімде ерекше әсер алып, сәлем беруге асықтым. Қарапайым  әрі сыпайы қасиеті адамды сүйкімді етеді емес пе? Әдеттегідей жылы шырай танытып, естелікке фотоға да түстік. Дәрігер бұл сапарымыздың дұрыс әрі пайдалы болатынына тілектестігін білдірді.

Кезегім келіп, дәрігерге дейінгі бөлме­ден тексеруден өттім. Онда өзіміздің жер­лесіміз қызылордалық Гүлнәр есімді медбике қызметін көрсетті. Бой-салмақ, қан қысымын өлшеп, ЭКГ-ге түсірді. Әрі қарай ЭХО-ның кезегіне отырдым. Орталық дәрігерлері бар жылы сөздерін айтып, тексеруге кірісіп кетті. Жарты сағатқа созылған тексеруден кейін әріптесімен ақылдаса келе, тағы да рентгенскопия аппаратына түсу қажеттігін, сонан соң ғана жүректің қақпашаларының ақаусыз жұмысына көз жеткізуге болатынын түсіндірді. Жаныма медбикені ерітіп, төртінші қабаттағы арнайы бөлмеге апарып, тағы да тексеру­ден өткізді. Оның нәтижесін күтіп отырғанда сағат та кешкі жетіге таяу қалды. Орталықтың жұмыс уақыты бесте аяқталғанымен, дәрігерлердің қам­қорлығының арқасында кардиохирург уа­қыт­­пен санаспай өз қабылдауын жасады. Сонау алыстан келген науқас ретінде бар ынтасымен зерттеу нәтижелерін бақылап, кеңесін берді. Жаңа тағайындауларын беріп, жүректі үнемі бақылауда ұстауым керектігін ескертті.

Шүкір, бар қиыншылық, уайым артта қалды, көңілді бір демдеп, орталық мамандарына алғысымызды жаудырып, кешқұрым орталықтан пәтерге оралдық.

Негізгі жұмысымыз біткен соң Аста­наның көрікті жерлерін тамашалауға  уақыт бұйырды. Алдымен еліміздің жүрегінде орналасқан Астананың символы Бәйтерекке барып, оның шыңына шығып, арман-тілегімізді айттық. Сонан соң Ханшатыр, «Экспо» көрмесі, «Айлэнд» отбасылық демалыс орталығы, «Мега» ойын сауық орталығы, Абу Даби плаза секілді көптеген керемет орындарды аралап, ғажайып көрі­ністерді тамашаладық.

2017 жылы күллі әлем тамашалаған «Экспо»-ның қазақстандық «Нұр Әлем» көрмесіне барып, сегіз қабаттан тұратын алып шардың әр қабатынан Болашақ Қазақстанды көруге мүмкіндік туды. Әсіресе Күн, жел, су, жел энергиясы мен адамзат бағындырған ғарыштың ғажайыптары т.б. көрмеде көрініс тапқан.
Ал Азияда теңдесі жоқ республикалық Бас мешіттің құрылысы тым ерекше екен, мешітке кірген бойда кеудеңді ерекше сезім билеп, жанын жадырай түседі. Имамның оқыған құранына қол жайып, садақамызды беріп, сапарымызды жақсылыққа ниет ет­тік.

Шын мәнінде күн сайын көріктене түскен Астананың ортасында қайнаған тіршіліктің куәсі болдық. Жан жақтан ағыл­ған туристер мен Қазақстанның түкпір-түкпі­рінен келген қонақтар Елор­даның келбетін тамсана тамашалайды. Биік-биік ғимараттардың сан алуан түрінде есеп жоқ. Жаңа қоныс аймақ­тары мен тұрғын үй кешендері елордалықтардың саны күн са­йын артып келе жатқандығын аңғартады. Барша Қазақ елінің мақтанышына айналған Ару-Астана, өсе бер, өркендей бер!

P.S. Адам жанының арашашысы болған ақ халатты абзал жандарға, Ұлттық кардио­хирургия орталығының кардиохирургы Иманбек Лаискановқа, жерлесіміз, кардио­хирург Әнуар Әбсадыковқа, жоғары санатты гинеколог Рамиль Мус­тафинге ал­ғыс білдіремін!

Бибісара ЖАНӘЛІ

Фото: ашық дереккөзден