Ауызашар берді
Айлардың сұлтаны – Рамазан айында ауызашар беру үлкен сауапты іс саналады. Жолда кетіп бара жатып, кез келген аузы берік адамға бір дана құрма немесе сумен болса да ауызашар беру – сауапқа кенелетін жақсы амал.Пайғамбарымыз (с.ғ.с): «Кімде-кім бұл айда аузы берік бір адамға ауызашар берсе күнәлары кешіріледі. Сол аузы берік адамның сауабындай сауап оған да беріледі» дегенде сахабалардың кейбірі аузы берік бір адамға да ауызашар беретіндей жағдайы жоқ екендіктерін айтты. Оларға Пайғамбарымыз (с.ғ.с): «Бір дана құрмамен де ауызашар бергенге де, тек сумен ғана оразасын аштырғанға да, кішкене сүт бергенге де осы сауап жазылады» деген. Міне, осындай мол сауапқа кенелуді қалайтындар қасиетті айда ауызашар ұйымдастырып, игілікті іс істеуде.
Аудан орталығындағы мешіт асханасында марқұм меценат Расул Есеновтың ағайын-туысы мен ұрпақтары жұртшылыққа ауызашар берді. Игі іске қариялар, ауыз бекіткен жандар мен тұрғындар қатысып, әркез елге жанашыр болып жүретін азаматты еске алды.
Ауызашарда мәдениет саласының ардагері Жантемір Айсин сөз сөйлеп, қасиетті айдағы оразаның қабыл болуын тіледі. Одан соң ауданның тыныс-тіршілігімен біте қайнасып жүрген ардақты азамат Р.Есеновтің қай кезде халыққа көмек қолын созып, жақсылық жасауға атсалысып жүретінін тілге тиек етті. Орны ойсырап қалғанын айтқан сала ардагері артындағы ұрпағы әке ісін жалғап, жергілікті тұрғындарға септігін тигізетініне сенім білдірді.
Мұнан соң әріптес достарынан Ержан Әжікенов пен Жұмабек Ембергенов сөз сөйлеп, Расул Әбутәліпұлының аудандық, облыстық мәслихат депутаты болған шақта ауданның игілігі үшін біраз жұмыстар атқарғанын еске алды. Ауданның дамуына ерекше еңбек сіңіргеніне тоқталып, ер есімі ұмытылмайтынын, оны ұмыттырмайтын ұрпақ бар екенін жеткізді. Әкенің өнегелі ісін ұлы Фархад жалғап келе жатқанын айтты.
«Он бір айым бір төбе, бұл бір айым бір төбе» дегендей, ауыз бекітудің адам денсаулығы мен жан дүниесінің жаңаруына пайдасы зор екендігін айтқан аудандық мешіттің бас имамы Асхат Асқарұлы қасиетті айда ауызашар ұйымдастырған жандарға ризашылығын білдірді. Ауызашар соңында Құран оқылып, дұға жасалды.
Е.БЕРКІНБАЕВ
