Құс жастықты қайта өңдейді

Тереңөзектік Кенжегүл Қалмағанбетова ерекше кәсіппен айналысуда. Он саусағынан өнер тамған ол құс жастықты қайта өңдеп шығарады екен. «Еңбек» бағдарламасы негізінде грант ұтып алған жеке кәсіпкер шағын бизнесін жандандыру үстінде. Жаңашылдыққа бет бұрған ісмер келіншек өзінің тың жобасы жөнінде бізге кеңінен айтып берді.

Жыл сайын «Еңбек» бағдар­ла­масына қатысушылар мал шар­уа­­­шылығы, тәттілер дайындау өн­дірісі, құс шаруашылығы, сән әлемі секілді бірнеше кәсіп бойынша жо­ба қор­ғайды. Бұл жолы – комиссия тара­пынан «Құс жастықты қайта өңдеу жобасы» ерекше қолдау тап­қан. Үздіксіз ізденістің арқасында Кенжегүл Қалмағанбетова жаңа кә­сіп­тің иесі атанды. Жеке кәсіпкер ескі жастықты қайта қалпына кел­тіру технологиясын туған ағасы Қанаттан үйренген. Негізінен, Қанат Қалмағанбетов жастықты қалпына келтіру үшін арнайы құрылғы қол­данады екен. Оның кәсібі Алматы қа­ласында. Осындай кәсіп түрі аудан жұрт­шылығы арасында сұранысқа ие екенін зерделеген Кенжегүл Әбуқызы отбасылық бизнесіне жан бітірді.

– Ертеректе үлкен кісілер құс жас­тық, иық жастық, мақтадан жас­тық жасауға шебер болатын. Әрбір үйде көрпеше тігіліп, көрпе түп­те­­­летін еді. Аналарымыздың түр­­лі түсті мата, мақта мен жүнді дайын­­­дықтан өткізіп, керемет жас­тық жа­сайтындығын көзіміз көрді. Қаза­қы өнердің ішінде тігінмен айналысу қыз баласына қиындық туғыз­байды. Қолы алтын апаларымыз кішкентай оймақты бізге ұстатып, тігін тігу­дің қыр-сырын үйрететін. Ізгілік­ті­ дәс­түр сабақтастығы бүгін­де «Болашаққа бағдар: рухани жаң­­­ғы­ру» бағ­дар­ламасы негізінде қай­та жан­дан­ғанына қуаныштымын. Кәсіппен айналысу үшін мем­­лекеттік бағдар­лама­ның игілігін көрген мен құс жастықты таза­лай­тын айрықша құ­рылғы сатып алған болатынмын. Құрылғының қосым­ша аппа­раты, бір­неше ма­териалы бар. Жастық­тың көлеміне қа­рай ақысы төле­неді. Құс жастықты қаптауға арнал­ған матамен өзім қам­та­ма­сыз етемін. Барлық жағынан жаңа­лап беремін. Бұрын ескірген жастықты жарам­сыз күйде қоқысқа тастай­тын болса, қазір көпшілік ма­ған тапсырыс беруде. Тәулігіне 20-30 жастықты өндеуге мүмкіндік бар. Алдағы уақытта кәсібімді кеңейтіп, жұмыссыз жастарға осы кәсіп түрін үйретсем деймін, – дейді жеке кәсіп­кер.

Иә, шаң-тозаңға толы жастықты өндеу оңай шаруа емес екен. Бұрынғы қалпына келтіру үшін ісмер көп күш жұмсайды. Күнделікті жеке кәсіпкер аудан бойынша тұтынушылардан көп­теп тапсырыс қабылдауға ниетті. Бірнеше жыл бойы тазаланбаған жас­тықты жаңа күйге айналдыру үшін Кенжегүл Әбуқызы түрлі әдіс-тә­сіл­ді қолданады.

Ендеше, кәсіп иесінің жұмысына сәт­тілік тілейміз!

Балтабай Аябекұлы