Қазақстан «жасыл» аймақта

Жер-жаһанды жүрі­сінен жаңылдырған коронавирустың қар­қыны бәсеңдеп, халық­тың көңілі жайланған еді. Тұрғындардың басым көпшілігі дертке қарсы екпе салдырып, науқастар түгел жазылғанымен арқаны кеңге салуға ерте се­кілді.

Ресми деректерге сүйенсек, атал­ған дерт бір дегеннен жоқ болып кетпейтініне көз жеткіземіз. Көпшілік жиын-тойға рұқсат беріліп, бетперде тағу міндеттелмегенімен ара-тұ­ра жаңалықтардан «коронавирус» деген сөзді кездестіріп қалып жүрге­німіз жасырын емес. Тіпті соңғы ай­дағы жағдай көпшіліктің үрейін ту­ғызуда. Аса ауыр дертпен ұзақ уа­қыт арпалысқан халық енді ғана ес жиып, етек жинаған тұста «Қайтадан бетперде тағу ұсынылады» деген ақ­парат жаға ұстатты.

ҚР Денсаулық сақтау министрлігі жағ­дайдың алдын алу мақсатында дабыл қағуда. Ал тұрғындарға бұ­рынғы жағдайды қайталамас үшін ба­рын­ша сақтық шараларын сақтау ұсынылады. Денсаулық сақтау ми­нис­трі Ажар Ғиният елдегі корона­вирус инфекциясының таралу ау­­қымы кеңейе бастағанын айтады. Сон­дай-ақ жағдай өршитін болса, бұрын қолданылған қатаң шектеу ша­ра­лары қайта енгізілетін болады.

«Деректер бойынша ең қиын болғаны – аурудың бесінші толқыны. Шектеу шаралары бұған дейін аймақ­тарға, ауру санына байланысты енгі­зілді. Алайда оны орындамағандар да болды. Соның салдарынан бізге ауруды ауыздықтау қиынға соқты. Егер коро­навирус өршіп, өңірлер қызыл аймақ­қа енсе, бұрынғы қатаң шектеу шаралары қайта енгізіледі» деген министр елдің қазір коронавирустың алтыншы толқынына кіріп жатқанын айтты.

Көзге көрінбейтін жау бір ғана ел­­ді емес, бүкіл әлемді жаулауға қауқар­лы. Тіпті дүниежүзінің ғалымдарын сарсаңға салып, аурудың түрлі штаммдары да шығуда. Британдық ғалымдар бұл дертті «ең ауыр әрі ұзаққа созылған ауру» деп бағалап отыр. Денсаулық сақтау министрінің мәліметінше, дү­ние­жүзінің белгілі бір елінде вирус­тың бізде жоқ штаммы пайда болса, шекаралық шектеулер енгізіледі.

«Ауруды айта берсең, саудың сабыры қашады» деген. Күнделікті «коронавирус» деген ақпарат аза­йып, көпшілік көкейіндегі күдік сейіл­генімен соңғы уақытта халық­тың қауіпсіздікті сақтауы туралы мәлімет­тер жиі жарияланып отыр. Не десек те, «Жаман айтпай жақсы жоқ» еке­нін естен шығармағанымыз абзал.
2020 жылдан бастап есептегенде елімізде ауру жұқтырғандардың барлығы миллион жарымға жуық­тайды. Олардың басым бөлігі дертпен күресте жеңіске жетсе, көзге көрін­бейтін дерт көпшілік отбасыға жазылмас жара салып кеткені де анық.

Осы жылдың 17 шілде күнгі дерекке сүйенсек, Қазақстанда 1477 адам коронавирус індетін жұқтыр­ған. Ауырғандар ПТР арқылы анық­талған. Аймақтар бойынша Алматы, Нұр-Сұлтан қалалары көш бас­таса, Қызылорда бойынша дертке шалдыққандар да баршылық.

Екпеден ем іздеп, вакцина қабыл­дағандардың саны он миллионға жуықтаған. Десек те, әлем елдерінде шектеу шараларының қайта енгізілуі көңілге күдік ұялатады.

Күні кеше ҚР Үкіметі жанындағы Қазақстанда коронавирустың таралуына жол бермеу жөніндегі ведом­ство­аралық комиссиясы эпидем­ио­логиялық ахуалды бағалау матрицасын жариялаған болатын. Ол бойынша еліміздің барлық өңірі «жасыл» аймақта. Десек те халықтың тазалық сақтап, қауіпсіздік шараларына ба­са мән бергені абзал екенін айта кеткіміз келеді. Жағдай тұрақталса да «емнің – екпеде», «саулықтың – сақтықта» екенін естен шығармаған жөн.

Аружан МҰХАНБЕТҚАЛИ