Бір тілде ғана білім алады
Биыл білім беру саласы біршама өзгерістермен толықтырылмақ. Көпшілік үшін жағымды жаңалықтың бірі – бірінші сынып оқушыларының бір тілде ғана білім алуы.Иә, биылдан бастап мектеп табалдырығын енді аттаған бүлдіршіндер үш тілді қатар меңгермейді. Жаңа оқу жылында қазақ мектебінің бірінші сыныбына барған балалар әліппені тек қазақ тілінде оқып үйренетін болады. Бірінші қыркүйектен бастап білім саласына енгізілетін жаңалықтар туралы Оқу-ағарту министрі Асхат Аймағамбетов мәлімдеді.
– Мұның алдында бірінші сыныпқа барған бала қазақ тілімен қатар, ағылшын және орыс тілінің әліппесін оқу керек болды. Бұл 6 жастағы бала үшін қиын. Баланы дамыту үшін ана тілін үйретіп алған өте маңызды. Біз сол шешімді қабылдадық. Биылдан бастап қазақ тілді мектепке барған балалар, тек қаза тілінде жазып, үйренетін болады, – деді министр.
Әріпті енді үйрене бастаған жас баланың өз туған тілін жетік меңгеруінің маңызы туралы Ахмет Байтұрсынұлы айтып кеткен. «Бала бастауыш мектепте бар пәнді тек ана тілінде ғана оқуы керек» деген ұлт ұстазы. Ендеше, көпшіліктің көкейінде жүрген бұл мәселенің шешім табуы тіл мәртебесін арттырудың бірден-бір жолы деуге толық негіз болады.
Сондай-ақ мұғалімдікті мамандық еткен жандардың мәртебесі де назардан тыс қалған емес. Осы ретте елімізде «Педагог мәртебесі туралы» арнайы заң жобасы бар екенін еске сала кетейік.
– Мұғалімдерді өздеріне тән емес жұмыстардан босаттық. Жалақысы өсті. Қазір бұл мәселе негізінде шешілді. Соның ішінде әртүрлі құжат, әртүрлі есеп тапсыру бойынша үлкен проблема болды. Жалпы мен қол қойған бұйрық бойынша педагог біріншіден күнделікті электронды журналға баға қояды. Екіншісі күнделікті оқу жоспарын дайындайды. Бітті, басқа ештеңе болмауы керек. Кімде-кім осы бұйрықты бұзатын болса, онда біз оларды қатаң жауапкершілікке тартамыз. Алдыңғы жылы осы бағытта 700-ге жуық адам түрлі жауапкершілікке тартылды, – деді педагогтардың мәртебесін көтеру бағытында атқарылып жатқан жұмыстардың нәтиже бере бастағанына тоқталып өткен министр.
«Тт» ақпарат
