Қазақ қыздарының қилы кезеңдердегі тағдыры суреттелетін шығарма жайында кітапхана оқырмандары ой қозғады. Тектілік пен тағылымды бойына жинаған нәзік жандылар жайында жазушы тебірене жазады. Бұл роман үш бөлімнен және жиырма төрт тараудан тұрады. Роман кейіпкері – Ұлпан бейнесі арқылы қазақ әйелінің образы ерекше бейнеленген. Барлық әйел затының ер азаматтардың атқарар жұмысын тең дәрежеде игеруі табандылық екені мәлім. Ел анасы ретінде Ұлпан көпшілікке сөзін өткізе білуі, өзінің артынан ерген ауыл әйелдеріне бас-көз бол­уы шығарманың мазмұнын аша түскен.

Өз кезегінде №132 Түймебай Айтбаев атындағы орта мектептің оқушылары шығармадан үзінді оқыды. Нағи Ілиясов ауыл әкімдігінің маманы Толғанай Айния­­зова, ауылдық мәдениет үйінің әдіскері Жадыра Құрақбай кітап туралы ойларын ортаға салды.

– Ана бейнесін суреттеу үшін жазушыға зор толғаныс керек болды. Айналасына шуағын төгіп жүретін Ұлпанды оқырман қауым жылы қабылдайды. Кейіпкердің тарт­қан барлық ауыртпалығын сезінеді. Со­ны­мен бірге ауыл өмірінен сыр шертеді. Қоғамда көптеген жағдай орын алады. Сон­дықтан шығарма күнделікті тұрмыс-тір­шілікті, сан қилы тағдырды баяндайды. Әрине, роман кейіпкерлері – өмірде болған адамдар. Біз бала кезімізде жазушы Ғабит Мүсіреповтің шығармаларын оқып өстік. Оның ішінде «Ұлпан» романының шоқтығы биік, – деді Ж.Құрақбай.

Оқырмандар конференциясында кітап­ханашы Сәуле Найзатаева «Ұлпан» романына библиографиялық шолу жасады.