Оқырмандар конференциясы өткізілді

Жақында аудандық «Достық» үйінің мәжіліс залында №1 филиал кітапханасының ұйымдастыруымен жазушы Әзілхан Нұршайықовтың «Махаббат қызық мол жылдар» романы бойынша оқырмандар конференциясы өткізілді.

Оқырмандар конференциясы бары­сында кітап сүйер қауым шығарма маз­мұны жөнінде пікір алмасты. Шығарма кейіпкерлері Ербол мен Меңтайдың іңкәр махаббаты, кіршіксіз сезімі, сенімі, жастық шағы жөнінде тереңнен ой қозғалды. Сонымен бірге шығарманың көркем тілі, мазмұны кеңінен талқыланды. Өз кезегінде еңбек ардагерлері Мұса Келдібаев, Зай­дағали Жүсіпбайұлы, Мектепхан Елеу­сінов, Жантемір Айсин, Әсия Масилова, Мырзалы Орынбаев, Алтын Нұртаева, Жұмакүл Көшербаева, Сәуле Ерімбет, Алтын Ізті­леуова, сала маманы Әділбек Шөжеев қоғам өміріндегі жастардың өзіндік орны жайлы сөз етті. Қазіргі уақытта өскелең ұрпақтың тәрбиесіне қатысты тың ақпараттармен бөлісті. Оқырмандарды кітап оқуға қызық­тыру жолдарын қарастыру керектігін жет­кізді.

Кездесу соңында аудандық мәдениет үйінің әншісі Динара Жәкешова «Есіңе мені алғайсың» әнін орындады. Кітапханашы Ләззат Серікбаева «Махаббат қызық мол жылдар» романының тарихына тоқталды. Әзілхан Нұршайықовтың кітаптары қойыл­ған көрмені таныстырды.

Б.ҚАРАМАНТЕГІ