Қауіпсіздікке қырағылық қажет

Жақында аудандық қоғамдық кеңестің кезекті отырысы өтіп, оның күн тәртібінде аудан көлемінде заңдылықты қамтамасыз ету, адам құқықтары мен бостандықтарын сақтау мәселелері, мал ұрлығын тоқтату және жол-көлік оқиғаларының алдын алу бағытындағы жұмыстар қаралды.

Жиында аудандық полиция бөлімі бас­шысының орынбасары Нұрлан Са­дықов ауданда қа­уіп­­сіз­дікті қамтамасыз етуге қатысты 9 айда ат­қарылған жұмыс­тарды баяндады.

Жалпы, биыл 9 ай­да аудан көлемінде бөтен мүлік ұр­лы­ғының тіркелуі былтырғы жылмен салыстырғанда 23,3 пайызға төмен­деген. Оның ішінде, пәтер ұрлығының тіркелуі 44,4 пайызға, мал ұрлығы 46,7 пайызға, ұялы телефон ұрлығы 33,3 пайызға азайған.

– Мемлекет басшысының ұр­лық қыл­мыстарының алдын алу бағытындағы жұ­мыстарды жандандыру жайлы тапсырмасына сәйкес, «Ұрлыққа қарсы іс-қимыл жөніндегі 2021-2023 жылдарға арналған» бағдар­ламаны іске асыру мақсатында, мүдделі органдармен ке­шенді ұйым­дастырушылық іс-ша­ра­лар жүргізілуде. Іс-шара нәти­же­сімен криминогендік жағдайға жасалған талдау көрсет­кендей, соңғы 4 жылда аудан бойынша мал ұрлығының төмен­дегені байқалады. Аудан бойынша тіркелген 8 мал ұрлығының 3-і қорадан, 5 дерегі немесе жалпы мал ұрлығының 62,5 пайызы қараусыз, бақташысыз өрістен ұрланып отыр. Бұл ретте, аудан әкімдігінде өткен әрбір ведомствоаралық құқық бұ­зушылық профилактикасы жөніндегі ко­миссия отырыстарында малды мін­детті түрде падамен бағуға бақта­шы­ларды енгізу ұсынылғанымен, ауыл әкім­дерімен бұл бағыттағы жұмыстар әлі күнге дейін толық шешімін таппай келеді. Біздің есебіміз бойынша аудан көлеміндегі 13 ауылдық округте 13 пада ұйымдастырылып, бақташымен қамтылған. Дегенмен, 1 ауылға 1 пада аздық етеді. Малды бақташысыз жайып жіберудің салдарынан, мал ұрлығымен тіркеліп, кейін малдары далалық жерде табылып, иелеріне қайтарылған деректерде кездеседі. Мұндай 1 қылмыстық іс өндірістен тоқтатылды, бұл ретте жоғалған малды іздеуге жеке құрамның басым күштері мен автокөліктері тартылады, – деді Н.Садықов.

Мал ұрлығының орын алуының тағы бір себебі азаматтардың малдың жоғалғаны туралы кеш хабарлауы болуда. 2021 жылдың 9 айында тіркелген 8 мал ұрлық қылмыстарының 6-ы он тәуілік ішінде, 2-і бір айдан кейін арыз­данған. Бұл әрине, қылмыстардың ашылуына кері әсерін тигізетіні анық. Оған қоса, малдарды таңбалау, сырғалау жұ­мыстары әлі де болса жеткіліксіз бо­луының салдарынан, ішкі істер органдары қызметкерлерінің мал ұрлықтары қылмыстарын ашу мен ұрланған малдарды тану барысында қиындықтар туғызады екен. Осыған орай, бөлім бас­шысының орынбасары құзырлы органдармен мал шаруашылығымен айналысатын азаматтарға малдардың саны және олардың таңбалануы, сырғалануы жайлы үгіт насихат жұмыстарын жандандыру қажеттігін айтты.

Тағы бір мәселе, тәртіп сақшылары құжатсыз мал тасымалдау фактілерін анық­тағанымен, ұсталған малды тексеру үшін уақытша орналастыру орындары бөлінбеген. «Құжатсыз мал та­­сы­­малдаған автокөліктер, үстіне тиіл­ген малымен бірге сол аймақтың ішкі іс­тер бөліністерінің ауласына уа­қытша қойылады. Малдың ұрлық емес­­тігін анықтау барысында, ол мал автокө­ліктен түсірілмейді, оған су, жем бе­рілмей, малға тиісті қарау жасалмайды. Мұндай жағдай қызмет барысында жиі кездесуде. Сондықтан құ­жат­сыз тасымалданған малдарды, уа­­қытша орналастыратын орындарды жә­не олар­дың жем, суы мен қарайтын қыз­мет­шілерін белгілеу қажет» деді хабарламашы.

Биылғы жылдың 9 айында өт­­­кен жылдың есепті кезеңімен салыс­тыр­ғанда қоғамдық орындарда жа­сал­ған қылмыстар 18,2 пайызға төмен­­деген. Сонымен қатар, «Мүлдем төзбеушілік» қағидаты бойынша аудан көлемінде 2021 жылы 1187 әкімшілік құқық бұзушылықтар анықталып, тиісті шаралар көріліпті. Ал аудан көлемінде өт­кен жылдың 9 айымен салыстырғанда биыл 20 жол-көлік оқиғасы орын алып, 5,3 пайызға өсім алған. Соның салдарынан 12 адам өмірден өтсе, әртүрлі дене жарақатын алғандар – 27 адам. Сондай-ақ, жыл басынан бері жол жү­ру ережесін бұзған 1418 әкімгершілік құқық бұзушылық анықталып, тиісті шара көрілген. Нұрлан Садықов жол қауіпсіздігін сақтауда тәртіп сақшылары тынымсыз қызмет етіп жатқанын атап, тұрғындар жол ережесін қатаң сақтау керектігін ескертті.

Қоғамдық кеңес отырысында кеңес мүшесі Алма Бақтиярова ауданда кадр тұрақтандыру мәселесін көтерді. Яғни, елді мекендер мен аудандық полиция бөліміне келген тәртіп сақшыларының сала жұмысын жандандыруда ұзақ мер­зімде қызмет етуі қажеттігін атады. Ал кеңес мүшесі Ұлмекен Жанәлиева пробация қызметінде есепте тұрған азаматтарды қоғамға бейімдеп, кәсіп ашуына көмек көрсетуді, оған бөлім тарапынан ұсыныстар берілу керектігін жеткізді. Келесі кезекте кент тұрғыны Қайрат Сүлейменов балалар қауіпсіздігін қам­тамасыз етуде сала жұмысын кү­шей­туге тоқталды. Яғни, бүгінде аудан орталығындағы №36, 210 мектеп жанынан көлік көп жүреді. Сондықтан осы білім ошақтары жанында кәмелетке толмағандармен жұмыс жасайтын инс­пекторлар оқушылардың қауіпсіздігін қамтамасыз етуі тиіс. Оған қоса, аудан орталығындағы бейнекамералардың жұ­­­­­­мыс іс­теуін бақылауға алып, сол арқылы қауіпсіздікті қамтамасыз етуге болатынын да тілге тиек етті. Кент тұрғыны көшеде жүрген малдарға қатысты да өз ойын білдіріп, оның жауапкершілігі туралы ақпараттандырылуы қажеттілігін атап өтті. Сонымен қатар, Тереңөзек пен Қызылорда аралығына қатынайтын такси көліктерінің де қауіпсіздігі бас­ты назарда болуы керектігін айтты.

Ұсыныс-пікір кезегінде аудандық мәслихат депутаты Жұмабек Ембергенов облыс орталығына баратын жол жөнделгеннен кейін жылдамдықты шек­­теуге қатысты белгілер қойылу ке­рек­тігіне тоқталды.

Ұсыныс-пікірлер тыңдалған соң қо­­ғам­дық кеңес төрағасы М.Омаров бар­лық мәселе хаттамаға түсіріліп, тиісті бөлімдерге жіберілетінін, аталған мәсе­лелердің шешімін табуы бақылауда болатынын атап көрсетті. Қоғамдық қауіпсіздік мәселесі әркез тұрақты назарда болу керектігін жеткізді.

Ердос БЕРКІНБАЕВ