Саяси маңызды құжат
Ел Президенті Қ.Тоқаев Қазақстан халқына кезекті Жолдауын жариялап, елдегі жағдай мен республиканың ішкі және сыртқы саясатының негізгі бағыттары туралы халықты хабардар етті. Мемлекет басшысы Тәуелсіздіктің 30 жылында атқарылған жұмыстар мен нақты атқарылуға тиісті шараларды толыққанды баяндады. Ендігі мақсат – Қазақстанның Орталық Азиядағы көшбасшылық рөлін күшейту, әлемдік экономикадағы орнын нығайту, халқымыздың әл-ауқатын көтеру.Президент алдымызға қойған нақты тапсырмалар еліміздің стратегиялық даму жоспарында қамтылған. Биылғы Жолдаудың бұған дейінгі Жолдаулардан ерекшелігі, соңғы 2 жылдағы әлемді жайлаған індеттен елімізді аман алып шығу жолдарына тоқталып, еліміздің тұрақты даму жолына шығу тетіктерін атап өтті.
Әлемді жайлаған індеттен бүкіл әлем зардабын тартқандай, Қазақстан үшін де оңай болған жоқ. «Коронавирус денсаулық сақтау саласы үшін үлкен сынақ болды. Пандемия салдарынан, карантин талаптарымен бюджетке кіріс азайып, бюджеттің шығыс бөлігінің міндеттерін орындау үшін бюджет тапшылығының ұлғайғаны рас» деген Президент пандемиядан кейінгі еліміздің даму жолдарын атап, нақты тапсырмалар жүктеді.
Бюджет кірісін арттыру үшін мемлекеттік шығыстардың ауқымын және оның тиімді жұмсалуын бақылауда ұстауды, осы жылдың соңына дейін Ұлттық қордың активтерін қалпына келтіру үшін бюджет ережесін енгізуді және Үкімет пен Ұлттық банктен жыл соңына дейін мемлекет қаржысын басқару тұжырымдамасын әзірлеуді тапсырды. Жолдауда «Бірінші байлық – денсаулық» қағидасын негізге алынып, денсаулық сақтау саласына қомақты қаржы бөлуді, бұл қаражаттың инфрақұрылымға, маман даярлауға және халықты дәрі-дәрмекпен қамтамасыз етуге жұмсалуға тиіс екенін міндеттелді. Оның ішінде, фармацевтика өнеркәсібіне ерекше көңіл бөлуді тапсырды. Бүгінгі күні еліміздегі дәрі-дәрмек пен медициналық құрал-жабдықтардың 17 пайызы отандық өнім. Осы өнімді 2025 жылы 50 пайызға жеткізу қажеттігін ескертті.
Қазіргі эпидахуалдан шығудың бірден-бір жолы, дүниежүзілік денсаулық сақтау ұйымы дәлелдегендей, вакцина қабылдау. Вакцина пайда болғаннан кейін ғана қауіпті дерттерге тосқауыл қойылғанын ұмытпауымыз керектігін атап өтті. Елімізде вакцина қоры жеткілікті, азаматтарымыздың таңдау мүмкіндігі бар. Көптеген мемлекеттердің бұған қолы жетпей отыр. Қазақстан – коронавирусқа қарсы вакцина жасап шығарған әлемдегі санаулы мемлекеттің бірі. «QazVac» вакцинасына өзге мемлекеттер де сұраныс білдіріп отыруы – үлкен жетістік.
Президент Қ.Тоқаев өз сөзінде айтқандай, Президент қызметіндегі ең басты мақсаты және тілегі – біздердің амандығымыз. Сол себепті осы Жолдауда беріліп отырған әрбір бастама халқымыздың әл-ауқатын арттыруға бағытталған. Бірінші бастама ең төменгі жалқы мөлшерін 2022 жылдың 1 қаңтарынан бастап 60 мың теңгеге дейін көтеруге арналса, екінші бастама қызметкерлерінің еңбекақысын көбейткен жұмыс берушілерге реттелмелі сатып алу жүйесі аясында мемлекеттен белсенді қолдау көрсетілмек. Ал үшінші бастамада 2023 жылдың 1 қаңтардан бастап, еңбекақы төлеу қорынан бірыңғай төлем енгізу жүзеге асырылады. Төртінші бастама 2022 жылдан 2025 жылға дейін бюджеттен қаржыландырылатын мәдениет қызметкерлері, мұрағатшылар, кітапханашылар, техникалық қызметкерлер, қорықшылар, көлік жүргізушілер және басқалар қызметкерлердің жалақысын жыл сайын орта есеппен 20 пайызға өсіруге, бесінші бастама, тұрғын үйге қолжетімділікті қамтамасыз етуге арналды.
Қазақстан Республикасының Президенті Қ.Тоқаевтың «Халық бірлігі және жүйелі реформалар – ел өркендеуінің берік негізі» тақырыбымен жолданған Қазақстан халқына кезекті Жолдауын Сырдария аудандық қазынашылық басқармасы ұжым болып оқып, «Бірлігімізді бекемдеп, ел үшін еңбек етейік» ұстанымын ұстануда. Президент берген тапсырмалардың жүзеге асырылуына басқарма қызметкерлері адал, мінсіз еңбектерімен өз үлесін қосатын болады.
З.РАХЫМШАЕВА,
Сырдария аудандық қазынашылық
басқармасының басшысы
