Бұрымдылар бәсекесінде үздік шықты

Жалынды жас, таланты спортшы Шынар Нұрлыбекқызының бапкерлік қызметті бастағанына көп уақыт болған жоқ. Бірақ аз уақыттың ішінде жетістіктерге жетіп үлгерді. Көгалдагы хоккейден қыздар құрамасы №36 Ә.Тәжібаев атындағы мектеп-лицей мен №131 Талғат Қозыбаев атындағы орта мектеп оқушыларынан құралған. Жас спортшылар жақында Талдықорған қаласында спорттың индор хоккейден 2005-2007 жылдар және одан кіші қыздар арасында өткізілген ҚР чемпионатына қатысып қайтты. Спортшы қыздар Орал, Талдықорған, Қаратау қалаларының индорхоккей шеберлерімен бірге бақ сынап, жүлделі ІІІ орынды жеңіп алды.
– Спорттың көгалдагы және индор хоккей түрімен қыздарымыз үздіксіз жаттығу үстінде. Бір жыл ішінде бірде-бір дайындықтан қол үзбеген спортшылар Талдықорған қаласында өткізілген ҚР чемпионатында үздіктер қатарынан көрінді. Бұл ретте, осындай жетістікке жету жолында ерік-жігеремді жаныған ұстазым Сұлтан Қобландин ағайға, чемпионатқа баруға қолдау көрсеткен №11 Сырдария ауданының олимпиадалық резервтің мамандандырылған балалар мен жасөспірімдер мектебінің директоры Бағдат Есеновке алғысымды білдіремін. Алдағы уақытта жас спортшылардың физикалық, моральдық тұрғыдан дайындығын пысықтап, зор жетістіктерге жетуге ұмтыламыз – дейді жас бапкер.
Шынар Ақназарова көгалдагы хоккеймен оқушы кезінен айналысады. Ол №131 Талғат Қозыбаев атындағы орта мектеп түлегі. Спортты серік еткен жан Қорқыт ата атындағы Қызылорда мемлекеттік университетін «Дене шынықтыру және спорт» мамандығын үздік дипломмен бітірген. Шымкент қаласындағы «Аймақтық әлеуметтік-инновациялық» университетінің «Педогика және психология» мамандығының магистрі атанды. Үздіксіз жаттығуды талап ететін спорт саласында Шынар секілді нәзік жанды арулардың болуы және аудан абыройын асқақтатуы бәріміз үшін қуаныш.
– Шәкірттерімнің ақпан айындағы ел чемпионатындағы жетістігі ауданымыздың абыройын асырды. Спорт – көп ізденуді талап ететін сала. Осы салада бапкерлік қызмет атқаруға бел буған Шынар Нұрлыбекқызына сәттілік тілеймін. Ауданымыздың атын шығарар спортшы аруларды мерекесімен құттықтаймын, – дейді С.Қобландин. Біз де спорттың жұлдызы атанған сырдариялық ұл-қыздар көп болғай дейміз.
Балтабай ОРДАБЕКОВ