Озат қыздардың ізбасары

Сырдария ауданы – ауыл шаруашылығы саласының майталмандарын дүниеге әкелген киелі топырақ. Оның ішінде ерге бергісіз мамандықты игерген нәзік жандылар да жетерлік. Атызда су кешіп, сыр салысын өсіруде озат шыққан батыр қыздардың ізбасары ретінде ақжармалық Қарашаш Қалменованың да есімін атауға болады.

Кейіпкеріміз Қарашаш Қалменова – ауданға қарасты Шаған ауылының тумасы. Ол осы ауылдағы 10 жылдық мектепті тәмамдаған соң, кеңшарда күрішші болып жұ­мыс жасауға кірісіпті. Еңбекке ер­те араласқан күрішші қыз өмір заң­дылығымен Ақжарма ауылына тұрмысқа шығады. Күндіз түні атқарған тынымсыз еңбегі, тө­гіл­ген маңдай тері өз жемісін бере бас­тайды. Ақжарма елді меке­нін­­де де осы салада еңбек еткен Қарашаш Әбенқызы 1978 жы­лы Сыр салысының әрбір гектары­нан 77 центнерден өнім алады. Ер­лермен қатар иық тіресіп ең­бек етіп жүрген аруға жары Бей­сенғазы Махамбетәліұлы білім алу­ға мүм­кіндік жасайды. Осылайша, есепші мамандығын игеріп, қызметі есеп-қисап саласына ауысады. 1990 жылы жарынан кенеттен айырылып қалған ана қиындыққа мойымай, балаларына бас-көз болып, отбасының түтінін түтетуге күш салады. Еңбегі адал жан 1981 жылдан бас­тап бас есеп­шінің орынбасары болып еңбек етіп келеді. Ол 1989 жылы шаруашылықтың сол кездегі директоры Бақыт Мыхановтың қолынан «Тұрғын үй – 1991» бағдарламасы аясында пәтер кілтін иеленген.

– Отағасынан ерте айырылып, қанатым ер­те қатайды. Өмірге әкел­ген 4 баламды өсіріп, жетілдіру үлкен мақсатым болды. Сол кезеңдегі шаруашылық директоры Бақыт мырза көп қолдау көрсетті. Жаңа үй беріп, шаруашылыққа өз еңбегімді сіңіруге мүмкіндік жасады. Бүгінде 4 баламнан тараған 18 немере мен 1 шөберенің аяулы әжесімін. Мереке қарсаңында барша ардақты аналарға көктемдей шуақты ғұмыр тілегім келеді, – деген Қарашаш Әбенқызы қазіргі шаруа­шылық басшысы, аудандық мәсли­хат депутаты Марат Бисеновке де өз ризашылығын білдірді.

Атап өту керек, күрішші болып еңбек жолын бастаған кейіпкеріміз аудан әкімінің, шаруашылық басшы­­сының «Алғыс хатымен» марапатталған. Сондай-ақ «Сырдария ауда­нының 90 жылдығы» мерекелік медалінің иегері.

Майя ҚОЖАБАЙ