Азаматтық қоғамды дамытудың алғышарты

«Мемлекет үкіметтік емес ұйым­дар­дың жұ­мы­сына барынша қолдау көр­сетуде. Соның нәти­жесінде азамат­тық қоғамның дамуы жыл санап жаңа биіктерге көтерілуде» дейді «Қызылорда об­­лысының Үкіметтік емес ұйым­дарының Альянсы Ассоциа­циясы» ЗТБ-нің Сырдария ау­данындағы өкілі Ұлмекен Жаналиева. Оның айтуынша, азаматтық қоғамды дамытуға қолдау білдіру арқылы мемлекет тұрақтылықты қамтамасыз етеді әрі қоғам мүшелерінің арман-мақсаты мен күш-жігерін бір ар­наға тоғыстырады.

– Еліміз Тәуелсіздік алған алғашқы күндерден бастап демократиялық жә­не құқықтық мемлекет болуды алдына мақсат етіп, азаматтық қоғам инсти­туттарын дамыту жолында сая­си және құқықтық шешімдер қабылданды. Аза­мат­тық қоғамды дамыту жөніндегі тұжырымдама әзірленіп, бекітілді. Атал­­ған құ­жатта азаматтық қоғамның қа­­лып­­тасуының бар­лық аспек­ті­лері, мем­лекеттік органдардың ҮЕҰ-мен өзара байланысы ай­­қын көрініс тапты, – деген «Қызылорда облысының Үкі­меттік емес ұйымдарының Аль­янсы Ассоциациясы» ЗТБ-нің Сырдария ауданындағы өкілі Сыр өңірінде, оның ішінде Сырдария ауданында да ҮЕҰ-ға қолдау көрсету үшін нақты жұмыстар атқарылып жатқанын айтады. ҮЕҰ-дың әлеуметтік маңызды жобаларын қаржыландыру да жылдан-жылға артып келеді.

– Анар Ізден жетекшілік ететін «Қызылорда облысының Үкіметтік емес ұйымдарының Альянсы Ассоциациясы» ЗТБ би­ыл көп жұмыс атқарды. Бірнеше маңызды басқосулар өтті, семинарлар, дөң­гелек үстелдер, кездесулер, қабылдаулар мен форум ұйымдастырылды. Соның бірі ретінде облыс орталығында «Қоғам және мемлекет: серік­тестігі мен дамуының 30 жылы «Birgemiz» ІХ азаматтық форумын айтуға болады. Аталған жиында көп мә­селе қозғалды. Тиісті минис­трліктің өкілі, облыс әкімінің орынбасары, мем­лекеттік мекеме басшылары қатысып, ҮЕҰ-дың мәселелері мен шешілу жол­­дары талқыланды. Алдағы мақсат-міндеттер айқындалып, ор­тақ ұсы­ным қабылданды. Ендігі кезекте сол ұсы­нымдар бойынша жұмыс істейтін боламыз, – дейді Ұ.Жаналиева.

Жалпы, ҮЕҰ-ды қолдау аза­маттық қоғамды да­мы­тудың ал­ғышарты. Бұл Ел Президентінің Жолдауында да нақты ай­тылған. Осы ретте, мемлекеттің қол­дауы мен жанашырлығын сезініп келе жатқан ҮЕҰ-дар қоғам үшін тиімді әрбір бастамаға үн қосып, ортақ іске атсалысуы тиіс.

А.ИБРАГИМҰЛЫ