Бітімгершілік мақсаты – тараптар татулығын сақтау

2018 жылдың басында Жоғарғы Сот төраға­сының бас­тамасымен сот жүйесін одан әрі дамыту мақсатында жеті басым міндет айқын­далып, жеті жоба бойынша жұмыс топтары құрылған болатын. Соның бірі – «Татуласу: сотқа дейін, сотта» жобасы. Осы жо­ба ая­сында Сырдария аудандық сотында билер кеңесімен бірге нәтижелі жұмыстар ат­қарылуда.

Болашағы біртұтас елдің барлық мем­лекеттік және азаматтық қоғам институты қызметінің ең басты қағидаты – қоғамдық келісімді сақтау және нығайту болып табылады. Яғни бітімгершілік рәсімдерінің басты мақсаты – тараптар татулығын сақтау.

Билер кеңесінің бүгінгі сот жүйесінде қолданылуы маңызды істі ата-баба ұстанған әділдік, адалдық, ашықтыққа негіздеуді талап етеді.

Қазіргі таңда билер кеңесі ескі дәстүрді жаңғыртып, ақыл-па­расатымен қара қылды қақ жаруға күш салып жатыр. Бұл халық үшін қолайлы әрі сот органдарының да жұмысын жеңілдетіп отыр. Осы орайда аудандық сотпен «Татуласу: сотқа дейін, сотта» пилоттық жобасы аясында Билер кеңесінің көмегімен осы күнге дейін 49 азаматтық іс тоқтатылды. Яғни талап қоюшылар «Сырдария аудан­дық жұмыспен қамту, әлеуметтік бағдар­ламалар және азаматтық хал актілерін тіркеу бөлімі» коммуналдық мемлекеттік мекемесі 49 жауапкерден негізсіз артық алынған мемлекеттік атаулы әлеуметтік көмекті өндіру туралы талаппен арызданған.

Алдын-ала сот отырысында тараптар ауданымыздағы Билер кеңесіне жүгінді. Билер кеңесінің төрағасы Мұса Келдібаев, мүше­лері Мектепхан Елеусінов, Кенжебек Мұстафаев өздерінің өмірлік тәжірибелеріне сүйе­ніп, тараптарды татуластыру жолымен дауды шешуге көмектесіп, 49 жауапкер өндірілуге тиіс сомаларды төлеуге мін­деттенді. Сот ұйғарымымен тараптардың татуласу келісімдері бекітіліп, іс жүргізу өндірістен тоқтатылды.

Жалпы, татуластыру шараларын қолдану­дың тағы бір тиімділігі – ол сот жүйесіндегі жүк­темені азайтады. Ең бастысы, дауды соз­балаңға салмай, оны шешу мерзімін қыс­қартады. Мұның бәрі түптеп келгенде, азаматтардың сотқа деген сенімін арттыруға өз септігін тигізеді. Татулық – табылмас бақыт.

Руслан Алдамбергенов,

аудандық соттың төрағасы