Сындарлы сәтте елмен біргеміз

ҚР Президенті Қ.Тоқаев бүгін төтенше жағдай режимін қамтамасыз ету жөніндегі мемлекеттік комиссия отырысында пандемияға ешкімнің дайын еместігін жеткізді. Себебі бұндай карантиндік режим елімізде алғаш рет орын алуда. Талай жыл ел басына күн туған шақта жұдырықтай жұмылып, қарсы тұрды. Елдің бірлігін сақтады. Бүгінгідей кезеңде де біз билік айтқан талаптарды сақтауымыз қажет. Президент пен үкімет бізге барлық жағынан көмекті беріп жатыр. Табысынан айырылған азаматтарға қаржылай қолдау, әлеуметтік аз қамтамасыз етілген отбасыларға арнайы пакеттер үлестіруде. Мұнымен қоса түрлі әлеуметтік желілерде эстрада жұлдыздары көңіл-күйімізді көтеру үшін жанды дауыста өз концерттерін беріп жатыр. Осы ретте Мемлекет басшысы да комиссия отырысында өнер жұлдыздарына өз ризашылығын білдірді.

– Осы мүмкіндікті пайдаланып, азаматтарға түсінгендері, шыдамдылық танытып, табанды болғандары үшін ризашылығымды білдіргім келеді. Мәдениет қайраткерлеріне жеке рақметімді жолдаймын. Олар сөзбен де, іспен де қазақстандықтарға көмектесуде. «Карантиндегі жұлдыз« жалпыұлттық жобасының барысын ризашылықпен қадағалап отырмын. Бірегей әрі пайдалы бастама», - деді Мемлекет басшысы. Осы ретте Қазақстан Президенті дағдарыс жағдайы және оған берілген жедел жауап ведомстволардың қызметін жетілдіру, сонымен қатар орталық пен өңірлер арасындағы үйлесімділікті күшейту қажеттігін көрсетіп бергендігін баса айтты.

Біз тәртіп пен режимге бағынсақ, өз саулығымыз үшін. Сондықтан әрбір адам тазалықты сақтап, үйде отырғанымыз жөн!

Нұрбол Тұранов

«Өрлеу» жастар сыйлығының иегері