Туды желбірету – әрбір спортшының арманы

Мемлекеттік Ту екі жағдайда көкке көтеріледі. Бірі – Мемлекет басшыларының іссапары кезінде және екіншісі – спортшы ел намысын қорғап, жүлделі тұғырға шыққанда. Мемлекеттік Гимнді қалықтатып, Туды желбірету – әрбір спортшының арманы. Мақсатқа қол жеткізу жолында аянбай тер төгіп жүрген, додалы жарыста бабы мен бағы келіскен сырдариялық спортшылар талай мәрте айды аспанға шығарды.

Ауданның спорт тарихы тым әріден басталады. Өткен ғасырдың 60-70 жылдары ауданнан есімі республикаға, тіпті әлем елдеріне белгілі болған саңлақ спортшылар шықты. Айтулы тұлғалардың қатарында боксшы А.Матиков пен А.Өрғараев, еркін күрестен А.Асиров, волейболшы Р.Кенжеғұлов пен Д.Бөлегенов, тоғызқұмалақшы Б.Абдулпаттаев пен Т.Болғанбаев есімдері зор мақтанышпен айтылады. Сонымен қатар ауданның атын шығарған көгалдағы хоккей командасы ел намысын әлі күнге дейін абыроймен қорғап жүр.

Спорт – тән мен жанның саулығын қатар дамытатын, құштарларды жеңіске жетелейтін, қиялға қанат бітіріп, арманды алға жеткізетін киелі өнер. Осы өнердің өрісін кеңейту – аудандағы спорт нұсқаушылар мен бапкерлердің міндеті. Тұрғындардың 12 мыңға жуығы жүйелі түрде спортпен айналысуы – спорттың бұқаралық сипат алғаны. Бұл көрсеткіш халықтың 30 процентін құрайды.

Аудандық деңгейден бастап, об­лыстық, республикалық, халықаралық жарыс өткізуге ыңғайланған бірнеше спорт нысаны ауданда жұмыс істейді. Биылғы жылы ең ауқымды түрде өткен турнир – ол Бесарық ауылында өткен дзюдодан республикалық жарыс. Жарысқа 700-ге жуық спортшы қатысқанын атап өткен жөн. Ал 400-ге тарта палуанның белдесуіне мүмкіндік берген «Алтын белбеу» облыстық жарысының аудандық кезеңі зор жетіс­тікпен өткеніне сырдариялықтар куә.

Жыл сайын дәстүрлі түрде өтетін Мемлекет және қоғам қайраткері Е.Кө­шербаевты еске алуға арналған волейболдан халықаралық турнир бірне­ше мәрте сырдариялық команданы чемпиондық атаққа жеткізді. Бұл спорт­тық жарыс бұқаралық спортты дамыту мен бәсекеге қабілетті біліктілігі жоғары спортшыларды әзірлеуге бағытталған шаралар. Жалпы осы уақытқа дейін аудан спортшыларының республика чемпионатында – 40 медаль, Азия чемпионатында – 8 медаль және әлем чемпионатында – 1 медаль иеленуі жемісті еңбектің көрсеткіші.

Ауданның спорт саласының маман­дары бір ғана Ұлттық құрама сапын­да ойын көрсететін 33 спортшыны баптағаны үлкен мақтаныш. Бүгін­де халықаралық дәрежеде ойын көр­сететін 9 спорт шебері, 36 спорт шебері, 102 спорт шеберіне үміткер және І разрядты 16 спортшы бар. Аудан спортшыларының тағы бір жетістігі – жаттықтырушылардың минис­тр­лік тарапынан жоғары атақ ие­ле­нуі. 2019 жылы ҚР Мәдениет және спорт министрлігі Спорт және дене шынық­тыру істері комитетінің төрағасы С.Сәпиевтің бұйрығымен Қ.Қарашаев, Б.Елеусінов және М.Әбжаппаров «Бі­лік­тілігі жоғары деңгейдегі жоғары санаттағы жаттықтырушысы» атағын алды. Бұл бапкерлер – тоғызқұмалақтан балалар­ды жоғары деңгейде жаттықтырып жүрген тәжіри­белі мамандар.

Спорт – адамды шыңдайды. Қиын­дықты жеңе білуге тәрбиелейді. Спортты жанына серік ету – саламатты өмірді таңдау. Ендеше аудан спортының дамуына өз үлесін қосып жүрген сыр­дариялықтардың мерейі әрқашанда арта түссін.

Бибісара ЖАНӘЛІ