Тәуелсіздіктің төл құрдасы

1991 жылғы 16 желтоқсан – Тәуелсіз Қазақстанның тарихында алтын әріппен жазылған айрықша күн. Байтақ елде бейбітшілік байрағы желбіреген бұл күнді сырдариялық Салимовтар әулеті жыл сайын асыға күтеді. Себебі осыдан 28 жыл бұрын атқан азаттықтың ақ таңында Сабыр аға мен Күләй апаның шаңырағында іңгәлаған сәби дүниеге келді. Екі ұлдан кейін туған қыз балаға Эльвира деп ат қойылды.

Тәуелсіздіктің төл құрдасы Эльвира Сабырқызы кішкентайынан ал­ғыр, тиянақты болып өсті. Өзі қа­тарлы балалар аяқталмас ойынның соңында жүргенде ол оңаша қалып ар­мандағанды ұнататын. Тым момын еді. Бұл туралы Эльвираның анасы Күләй апа төмендегідей баяндайды.

– Әдетте отбасындағы екі ер баладан кейін туған қыз еркетотай болып келеді ғой. Бірақ қызымыз Эльвира ерке болып өспеді. Керісінше, тұйық әрі момын болатын, жеке қа­лып, өзімен-өзі ойнағанды ұната­тын. Тәуелсіздік күнімен тұспа-тұс дү­ниеге келген қызымыз мектеп қа­быр­ғасында да үлгілі оқушы болды. Қазір аудан әкімі аппаратында жұмыс істейді. Жыл сайын 16 желтоқсанды асыға күтеміз. Себебі бұл күн біз үшін – қос мереке тойланатын айтулы күн, – дейді абзал ана.

Иә, расында да Эльвираның мі­незі, болмыс-бітімі қазақ қызына тән бия­зылықпен үндес. Жөн-жосықсыз сөй­ле­мейді. Сырға берік. Нәзік жаны та­залықты, адалдықты сүйеді. Жаны таза болған соң өзгелердің бойынан да тазалықты көруге асығады. Жұмысына да адал. Қай істі тап­сырсаң да нақты нәтижеге жетпей ізденісін тоқтатпайды.

– Мемлекеттік мекемеде қызмет істеу зор жауапкершілікті талап еді. Әр жұмыс, әр тапсырма өте маңызды. Аудан әкімінің орынбасар­ларының хат­шылығында бірнеше жыл жұмыс іс­теп, көп тәжірибе жинақтадым. Ұжым­дағы үлкен кісілер үнемі ақыл-кеңесін айтып, бағыт-бағдар беріп отырды. Мұның бәрі біздің маман болып қалыптасуымызға тікелей әсер етті, – дейді Эльвира мемлекеттік қызмет саласындағы үлгі тұтатын алдыңғы буын аға-апаларына зор ризашылықпен.

Бүгінде Эльвира Салимова ау­дан әкімі аппаратының құжаттамалық қамтамасыз ету және бақылау бөлімінің әдіскері қызметін атқаруда. Бұл қызмет жауапкершілікті, тиянақ­тылықты талап етеді. Өйткені таңер­теңнен бастап жұмыс аяғына дейін аудан әкіміне, аудан әкімінің орынбасарлары мен аппарат басшысына келген хаттар тіркеліп, кірістеліп, бұрыштама белгіленіп, тиісті басшыға ұсынылып, құжат айналымы уақытылы, сапалы жүргізілуі керек. Сонымен қатар келген хаттарға мерзімінде жауап берілу қажет. Атап өту керек, жеке және заңды тұлғалар өкілдеріне арналған қабылдау мен арыз-шағымдармен жұ­мыс жүргізуді де аталған бөлімнің мамандары ұйымдастырады. Міне, осын­дай жауапты жұмыста шыңдалған Эльвира Сабырқызы – қазіргі таңда өз ісінің білікті маманы.

Ол жауапкершілігі мол жұмысты адал атқарып, облыс әкімі орынба­сары­ның, аудан әкімінің және басқар­ма басшыларының бірнеше мәрте Алғыс хатымен марапатталған. Сон­дай-ақ ел Тәуелсіздігінің 25 жыл­дығы қарсаңында Nur Otan партия­сы аудандық филиалы тарапынан да Алғыс иеленген. Мұның бәрі ізденіске толы еңбектің жемісі екені анық. Тәуелсіздіктің төл құрдасы «же­тістіктерімнің барлығы біз үшін бас­ты құндылық болып саналатын Тәу­­­­елсіздіктің арқасында келген игі­лік» дейді. Айтса айтқандай, Эльвира Сабырқызы қасиетті де қастерлі Тәуелсіздік ұғымының арқасында жыл сайын дамып келе жатқан егемен елмен бірге жақсы жетістіктерге құлаш сермеуде. Әр жетістігін азаттықпен байланыстырады. Сірә, бұдан асқан бақыт жоқ та шығар...

Ақтөре ИБРАГИМҰЛЫ