Электронды қызмет алу – уақыт талабы

ХХІ ғасыр – ақпарат ғасыры болып табылады, адамзат қауымы дамудың жаңа сатысына – ақпараттық қоғамға аяқ басты. Осындай әлемдік ауқымда жүріп жатқан заманауи үрдістен, өркениеттің көшінен біздің еліміз де қалыс қалмасы түсінікті. Күнделікті тіршілікте біздің көп уақытымыз мемлекеттік қызмет алу үшін кезек күтумен өтеді, жол шығындары да бар. Осылардың алдын алу мақсатында мемлекеттік көрсетілетін қызметтерді электронды нұсқаға ауыстыру қажет болды. Электрондық үкімет порталы халыққа мемлекеттік қызметтерді көрсетуді бір терезе принципі бойынша жеңілдету мақсатымен құрылған. Бұл мемлекеттік орындардың барлық ақпараттық ресурстарына қолжетімділіктің бір нүктесі. Яғни, түрлі анықтамалар алу, баланың туу туралы куәлігін алу, оны балабақша кезегіне тіркеу, зейнетақы тағайындау туралы ақпарат алу және т.б. Жоғарыда көрсетілген қызметтерді электронды түрде алу үшін тек қана интернет желісіне қосылған смартфон арқылы алуға болады.

«Электрондық үкімет» веб-порталын құруға Қазақстан Республикасы Президентінің 2004 жылғы 10-шы қарашада  «Қазақстан Республикасында 2005-2007 жылдары «электрондық үкіметті» құру туралы мемлекеттік бағдарламасы» туралы Үкімі негіз болды. «Электрондық үкімет» порталы 2006 жылы іске қосылды.

Электрондық үкімет – халықтарды ел үкіметімен тікелей байланыстыруды қамтамасыз ететін жүйе.

Қазақстанда «Электрондық үкімет» азаматтар мен ұйымдарға мемлекеттік органдардың қызмет көрсетуі сапасының жоғарылығы мен қысқа мерзімділікке және мемлекеттік органдардың қызметінің ақпараттық базасымен байланысты қамтамасыз етуге, мемлекеттік аппарат құрамы бойынша эффективті және тиімді құрылуына бағытталған «Электрондық үкімет» азаматтардың мемлекетпен өзара әсерін және мемлекеттік қызметпен байланысын тәулігіне 24 сағат, аптасына жеті күн, географиялық орналасуы мен жыл мезгілдерінен тәуелсіз қамтамасыз етіледі.

Мемлекеттік мекемелердің барлық қызмет түрлері әрбір адамға кез-келген уақытта көрсетіледі.

Бүгінгі күні облысымызда «электрондық  үкімет» порталы арқылы бір айда 1,5 миллионнан астам мемлекеттік қызмет көрсетіледі. Аталған көрсеткіш «электрондық  үкімет» порталы халық үшін ыңғайлығы және тиімділігін көрсетеді.

Қорытындылай келе, электронды форматта қызмет алу ХХІ ғасырдың талабы екені анық. Аталған уақыттың талабына E-gov «электрондық  үкімет» порталы толықтай сай екенін уақытпен және оң көрсеткіштермен дәлелдеп келеді.

Р.Еспенбетов,
ҚР Мемлекеттік қызмет агенттігінің

Қызылорда облысы бойынша департаментінің,
Мемлекеттік қызмет көрсету басқармасының
бас маманы